U Biełarusi ŭstanoŭleny terminy pačatku zboru dzikich žuravin i bruśnicaŭ.
Jak paviedamlaje Ministerstva pryrodnych resursaŭ i achovy navakolnaha asiarodździa, u Viciebskaj vobłaści bruśnicy možna źbirać z 16 žniŭnia, u Minskaj — z 22 žniŭnia, u Mahiloŭskaj — z 23 žniŭnia, u Bresckaj, Homielskaj i Hrodzienskaj abłaściach — z 25 žniŭnia.
Zbor žuravin pačaŭsia 23 žniŭnia ŭ Mahiloŭskaj vobłaści, 25 žniŭnia — u Viciebskaj i Homielskaj. U Bresckaj vobłaści žuraviny možna źbirać z 5 vieraśnia, u Minskaj — z 6 vieraśnia, u Hrodzienskaj — z 10 vieraśnia.
U Minpryrody nahadvajuć, što ŭ adpaviednaści z art. 15.26 Kodeksa ab administracyjnych pravaparušeńniach, parušeńnie ŭstanoŭlenych terminaŭ, prymianieńnie zabaronienych srodkaŭ abo mietadaŭ zboru abo narychtoŭki hryboŭ, inšych dzikich raślin abo ich častak abo inšaje parušeńnie praviłaŭ zboru abo narychtoŭki ciahnuć papiaredžańnie abo štraf u pamiery da 20 bazavych vieličyń dla fizičnych asob, da 100 bazavych vieličyń — dla indyvidualnych pradprymalnikaŭ, da 500 bazavych vieličyń — dla jurydyčnych asob.
U ministerstvie taksama nahadali, što zbor dzikich jahad mahčymy tolki ŭ vypadku źniaćcia zabarony na naviedvańnie lasoŭ, jakaja ŭ pačatku žniŭnia była ŭviedzienaja pa ŭsioj krainie ŭ suviazi z vysokaj pažarnaj niebiaśpiekaj. Zhodna z art. 15.29 KoAP, parušeńnie patrabavańniaŭ pažarnaj biaśpieki ŭ lasach abo na tarfianikach abo zabarony na ich naviedvańnie, jakoje nie pryčyniła ŭronu, ciahnie papiaredžańnie abo nakładańnie štrafu ŭ pamiery da 25 bazavych vieličyń.
Ciapier u šerahu rajonaŭ krainy źniata zabarona na naviedvańnie lasoŭ, adnak bolš padrabiaznuju infarmacyju možna atrymać u miascovych vykanaŭčych i rasparadčych orhanach.
