U Kłajpiedskim porcie z 7 lipienia «zatrymałasia» pradukcyja žyviolnaha pachodžańnia, usiaho kala 100 000 ton. Rasija abmiežavała mahčymaść pravierki tavaraŭ, jakija viazuć u krainy SND praź Litvu. Takija ž abmiežavańni raspaŭsiudžvajucca na Łatviju i Estoniju.
Namieśnik dyrektara Dziaržaŭnaj charčova-vieterynarnaj słužby Zianonas Staniavičus skazaŭ, što aficyjnaje paviedamleńnie z «Raśsielhasnahladu» Litva atrymała 4 lipienia. U im paznačana, što jano zaćvierdžana 26 červienia.
«Čutki pamiž pradprymalnikami chadzili, ale tolki farmalna. Naša słužba atrymała dakumient u minułuju piatnicu», — skazaŭ jon.
Pa słovach dyrektara słužby, u Kłajpiedskim porcie «zatrymałasia» zamarožanaja pradukcyja žyviolnaha pachodžańnia. Litvie, jak i Łatvii z Estonijaj, nie dazvalajuć paškodžvać płomby na hruzach i praviarać, ci adpaviadaje pradukcyja tamu, što paznačana ŭ dakumientach.
«Rasija napisała, što abmiežavańnie raspaŭsiudžvajecca na tyja pradukty, dla jakich patrabujecca vieterynarny siertyfikat: heta značyć na rybu i miasa», — skazaŭ jon.
Infarmacyja pra abmiežavańni, jakija Rasija pryniała ŭ dačynieńni da krainaŭ Bałtyi, była pieradadziena Jeŭrakamisii. Staniavičus skazaŭ, što ŭ piatnicu ŭ Bruseli źbiarucca kiraŭniki vieterynarnych słužbaŭ, buduć abmiarkoŭvać, jakija dziejańni raspačać u dadzienym vypadku.
Pa słovach Staniavičusa, infarmacyja, jakaja źmieščana ŭ dakumiencie z Rasii, parušaje patrabavańni Jeŭrasajuza.
«Patrabavańnie Rasii — my nie majem prava pravieryć tranzitnyja hruzy na pradmiet adpaviednaści pakazanamu ŭ dakumientach — źniać płomby i pahladzieć, ci sapraŭdy tam toje, što paznačana ŭ dakumientach», — skazaŭ jon.
