Sotni ludziej sustreli uzychod sonca krykami «Banzaj» na viaršyni śviatoj dla japoncaŭ hary Fudzi, dzie 1 lipienia aficyjna pačaŭsia siezon uzychodžańniaŭ.
Było vobłačna, adnak na niejki momant chmary razyšlisia, i ludziam udałosia ŭbačyć čyrvony dysk sonca. Dakładny lik pałomnikaŭ pakul vyznačyć ciažka. Pakul što na viaršyniu hetaha śpiačaha vułkana na vyšyni 3776 m možna padniacca pa troch ściežkach. Na čaćviortaj jašče zastajecca śnieh, i hetuju trasu adkryjuć paźniej.
Z 1 lipienia na Fudžy novaŭviadzieńnie — kab padniacca na śviatuju haru, treba ŭnieści «dobraachvotnuju płatu» — 1 tys. jen ($10). Uzamien padarožnik atrymlivaje značok, jaki śviedčyć, što jon sapraŭdy ździejśniŭ uzychodžańnie.
Letaś, kali płatu ŭ tysiaču jen brali na praciahu 10 dzion, ŭdałosia sabrać 34 młn jen (kala $340 tys.).
Srodki buduć skiravanyja na abstalavańnie tualetaŭ, miescaŭ adpačynku, rašeńnie prablem ekałohii. Niahledziačy na akuratnaść pałomnikaŭ, na schiłach znakamitaha vułkana zastajecca ŭsio bolš śmiećcia, ŭborka jakoha taksama patrabuje hrošaj.
Na Fudžy štohod padymajecca kala 400 tys. čałaviek. Sioleta čakajuć bolšaha ich napłyvu.
Reč u tym, što letaś Fudzi patrapiła ŭ śpis Suśvietnaj spadčyny JUNIESKA, što istotna padniało papularnaść uzychodžańniaŭ.
Kab dabracca da viaršyni, treba vydatkavać nie mienš za šeść hadzin, i niespraktykavanym padarožnikam pry hetym pahražajuć soniečnyja apioki i niedachop kisłarodu.
Fudzi — choć i śpić, ale dziejučy vułkan. Jaho vyviaržeńnie ŭ apošni raz adbyłosia ŭ 1708 hodzie.
