Znajdzicie 10 adroźnieńniaŭ. Nu, dobra, nie 10, choć by paračku.
«Ukrainskija siłaviki pačali nastup na asnoŭnyja pazicyi bajcoŭ narodnaj samaabarony», «Apałčeńnie Słavianska śćviardžaje, što źbiła Su-25», «Pad Słavianskam apałčency padbili čatyry ŭkrainskich BTR», - paviedamlajuć Viesti 24 u svaich navinavych siužetach na telekanale «Rośsija 24», asabliva nie zadajučysia pytańniami, adkul u «narodnaj samaabarony» ci «apałčeńnia» ŭziałosia ŭzbrajeńnie, zdolnaje źbić dahukavy šturmavik, a taksama źniščyć viertalot, niekalki tankaŭ i BTR. Nie pałožana im pa redakcyjnaj palitycy zabivać hałovy takimi pytańniami, piša «Obozrievatiel».
A voś uryŭki z navinavych siužetaŭ inšaha kanała - Euronews.
«Łuhanski pamiežatrad atakavany apałčencami ŁNR», «Pieramirje, abvieščanaje raniej u Łuhansku, pierarvana, i boj pa-prarasiejsku nastrojenych apałčencaŭ z pamiežnikami adnaviŭsia znoŭ», - raspaviadaje svajoj ruskamoŭnaj aŭdytoryi jeŭrapiejski kanał, hałoŭnaj zadačaj jakoha, u adpaviednaści z redakcyjnym statutam, źjaŭlajecca aśviatleńnie navin u «kantekście pabudovy jeŭrapiejskaha adzinstva».
Euronews hetak ža, jak i rasiejskija žurnalisty, nie zaŭvažaje dobra ŭzbrojenych, časam navat - pieranosnymi zienitna-rakietnymi kompleksami, najomnych vajskoŭcaŭ - niaredka z rasiejskimi pašpartami, zaličyli usich pad adzin hrabianiec u šerahi tak zvanaha narodnaha apałčeńnia.
Ale na hetym niuansy redakcyjnaj palityki Euronews nie skančajucca. Ukrainskaja, rasiejskaja i anhlijskaja redakcyi kanała časam pa-svojmu traktujuć padziei, jakija adbyvajucca va Ukrainie, adpaviedna pa-roznamu nazyvajučy «zialonych čałaviečkaŭ», jakija źjavilisia na terytoryi Danieckaj i Łuhanskaj abłaściej.
Nižej - navina pra adnu i tuju ž padzieju na troch movach. Va ŭkrainskaj viersii Euronews terarystaŭ nazyvajuć «bajevikami» i «ŭzbrojenymi ludźmi, jakija padtrymlivajuć sieparatyzm». U anhłamoŭnaj - «sieparatystami» i «prarasiejskimi napadnikami». A voś u ruskim varyjancie hetaj ža naviny zhadka pra sieparatyzm, jaki, darečy, va Ukrainie kryminalna nakazvajecca, u źviazku z pradstaŭnikami samaabvieščanych Danieckaj i Łuhanskaj respublik źnikaje. Uzbrojenyja da zuboŭ terarysty ŭ žurnalisckim tekście nazyvajucca «apałčencami», «paŭstancami», maksimum - «bajcami». Choć u inšych materyjałach ruskamoŭnaj viersii Euronews ich nie raz charaktaryzujuć jak «sieparatystaŭ».
Prybiary nazvu kanała - i rytoryku jeŭrapiejskaha viaščalnika nie adroźniš ad prakramloŭskich ideałahiemaŭ, jakija raspaŭsiudžvajucca kisialovymi, sałaŭjovymi i padobnymi. Chiba što bolš kulturnaja taja, ściplej niejak.
Dziŭnaje adzinstva pazicyj stanovicca mienš dziŭnym paśla taho, jak pahladziš pieralik najbujniejšych akcyjanieraŭ Euronews. Usierasiejskaja dziaržaŭnaja teleradyjoviaščalnaja kampanija (VHTRK) z 2004 hoda vałodaje amal 17% akcyj Euronews, źjaŭlajučysia trecim najbujniejšym ułaśnikam jeŭrapiejskaha viaščalnika, paśla Francyi i Italii.
Nazvanaja VHTRK uklučaje ŭ siabie davoli viadomyja telekanały «Rośsija 24», «Rośsija-1», «RTR-płanieta». Umiełymi i vyraznymi ručkami Dźmitryj Kisialoŭ tam dyryžuje choram antyŭkrainskich hałasoŭ.
Valid Arfuš, kiraŭnik Euronews u SND, śmiajecca ŭ adkaz na mierkavańnie, što kiravany im kanał padyhryvaje Rasiei.
«Svabodnaja žurnalistyka, što - aznačaje padtrymku kramloŭskaj prapahandy? - pytańniem na pytańnie adkazvaje jon. - U redakcyi Euronews zaŭsiody źbirajucca narady, na jakich vyznačajecca, kaho i jak zvać. Luby ŚMI maje prava nazyvać tuju ci inšuju padzieju tak, jak ličyć heta patrebnym. Mižnarodny telekanał nie moža być sudździoj u tym, što adbyvajecca. My tolki pakazvajem, što adbyvajecca. Ja z vami całkam nie zhodny. Euronews robić svaju pracu tak, jak ličyć patrebnym - u nas absalutna svabodnaja, niezaležnaja žurnalisckaja praca, jakaja nie zaležnaja ni ad jakoha rasiejskaha ci ŭkrainskaha cisku».
Luboje ŭmiašańnie rasiejskich akcyjanieraŭ u vybar tanalnaści pry aśviatleńni padziej Valid Arfuš adkidvaje. Śćviardžaje: jamu nichto z Rasiei adnosna siužetaŭ nie telefanuje.
Choć nie ŭ apošniuju čarhu dla taho, kab mieć mahčymaść pryŭnieści svajo bačańnie ŭ aśviatleńnie suśvietnych padziej, VHTRK tak nastojliva imknułasia ŭvajści ŭ trojku najbolš upłyvovych akcyjanieraŭ jeŭraviaščalnika.
«Vielmi važna toje, što ciapier naš punkt hledžańnia na tyja ci inšyja mižnarodnyja padziei, biezumoŭna, budzie ŭličvacca», - nieaściarožna skazaŭ paśla zaviaršeńnia ździełki ŭ 2004 hodzie namieśnik staršyni VHTRK Andrej Bystrycki.
Praź niekalki hadoŭ paśla nabyćcia Rasiejaj prava hołasu na Euronews u intervju haziecie «Kommiersant» prezident telekanała Filip Kajła raspavioŭ, jak Maskva sprabavała ŭpłyvać na žurnalistaŭ, jakija pracujuć u ofisie kanała ŭ Leonie: «Ja viedaju, što žurnalisty našaj ruskaj słužby atrymlivajuć zvanki z Maskvy, i im vykazvałasia niekatoraja niezadavolenaść tymi ci inšymi siužetami. A ja asabista, naprykład, atrymaŭ list z rasiejskaha MZS z nahody taho, što Euronews nie tak aśviatlaŭ pazicyju Rasiei ŭ Kosava».
