Jak paviedamili ŭ Dziaržaŭnym mytnym kamitecie, zadačaj pamiežnikaŭ i mytnikaŭ na čas Čempijanatu śvietu pa chakiei budzie niedapuščeńnie pravozu praź miažu zbroi, narkotykaŭ, zabaronienych pradmietaŭ, abjektaŭ intelektualnaj ułasnaści, valuty ŭ pamierach, što pieravyšajuć normy. Apieracyja nazyvajecca «Lod», jana pačałasia 2 maja i skončycca 1 červienia. U jaje miežach buduć asabliva adsočvacca taksama paštovyja i kurjerskija adpraŭleńni.
Jak viadoma, na čas praviadzieńnia pieršynstva zaŭziatary ź inšych krain mohuć ujazdžać u Biełaruś bieź vizaŭ, na padstavie biletaŭ na turnir. Adpaviedna kolkaści pradadzienych kvitkoŭ, Biełaruś čakaje 35 tysiač fanaŭ z Rasii i 33 tysiačy — ź Jeŭrasajuza.
Karespandent «Našaj Nivy», jaki pierasiakaŭ biełaruskuju miažu, nie adčuŭ, adnak, nijakich dadatkovych niazručnaściaŭ. Mytny nadhlad ažyćciaŭlaŭsia ŭ zvyčajnych formach.
Ź cikavostak: uładalnikam biletaŭ na Čempijanat pamiežniki ŭručajuć kalarovy buklet-pamiatku ab praviłach pavodzinaŭ u Biełarusi.
