Kitajski patrulny samalot vyjaviŭ nieapaznanyja abjekty, jakija płavajuć ŭ rajonie, adkul pastupajuć mierkavanyja sihnały «čornych skryniaŭ» źnikłaha «Boinha».
Pra heta 9 krasavika paviedamlaje ahienctva «Sińchua». Da miesca vyjaŭleńnia abjektaŭ nakiravali kitajskija karabli. Ab znachodcy prainfarmavali i aŭstralijski kaardynacyjny centr pošukaŭ źnikłaha samalota, ale pra jaho reakcyju pakul ničoha nie paviedamlajecca.
Raniej u toj ža dzień radary aŭstralijskaha pašukova-vyratavalnaha sudna «Oušen Šyłd» (Ocean Shield) iznoŭ złavili sihnały, jakija pastupajuć na chvali «čornych skryniaŭ». Kiraŭnik słužby Anhus Chjustan (Angus Houston) zajaviŭ, što spadziajecca na paśpiachovaje zaviaršeńnie pašukovaj apieracyi ŭ bližejšyja dni, pieradaje Agence France-Presse.
Apieracyja pa pošuku źnikłaha «Boinha» praciahvajecca ŭžo bolš za miesiac. U ciapierašni čas u joj prymajuć udzieł 11 vajennych i čatyry hramadzianskija samaloty, a taksama 14 karabloŭ. Pošuki prachodziać u Indyjskim akijanie.
Boeing-777 avijakampanii Malaysia Airlines, jaki vykonvaŭ rejs z Kuała-Łumpura ŭ Piekin, źnik z ekranaŭ radaraŭ u noč na 8 sakavika. Na borcie sudna znachodzilisia 239 čałaviek — u asnoŭnym hramadzianie Kitaja, Tajvania i Małajzii.