8 krasavika z turmy budzie vyzvaleny vaŭkavyski pradprymalnik, veteran aŭhanskaj vajny Mikałaj Aŭtuchovič.
Za dva tydni da vychadu na volu ź inicyjatyvy nieabyjakavych ludziej abvieščany zbor srodkaŭ dla palitviaźnia. Dapamahčy Aŭtuchoviču zaklikaje kolišni načalnik mienskaha SIZA № 1, aŭtar knihi «Rasstrelnaja kamanda» Aleh Ałkajeŭ, jaki ciapier žyvie ŭ Niamieččynie.
Ałkajeŭ źviarnuŭsia da biełaruskaha hramadztva praz Fejsbuk:
«Paśla adbyćcia niezasłužanaha pakarańnia na volu vychodzić Mikałaj Aŭtuchovič. Jon nia byŭ ni apazycyjnym palitykam, ni čynoŭnikam-chabarnikam, ni dzialcom-kradunom. Tym nia mieniej ahułam byŭ pazbaŭleny voli na doŭhich 9 hadoŭ! Čamu mienavita Aŭtuchovič? Tamu što jon nie zachacieŭ žyć u chłuśni i kryvadušnaści, jakija stali normaj u sučasnaj Biełarusi, i ŭ adzinočku supraćstajaŭ karumpavanaj systemie miascovaj ułady. Za što i zaznaŭ na sabie ŭsiu lutaść podłaj systemy. Praz dva tydni Mikałaj vychodzić na svabodu. Baraćba kaštavała jamu zdaroŭja. Addajučy daninu pavahi jahonaj mužnaści i ŭ znak udziačnaści za hieraičny prykład baraćby za ŭłasnuju čałaviečuju hodnaść my prosta abaviazanyja padtrymać jaho ciapier užo nia słovami, zajavami i praklonami, a realnaj spravaj. My pavinny dapamahčy jamu adnavić zdaroŭje, jak jon sam piša, «što možna ŭratavać, a što tolki krychu padlačyć. Na žal, nia ŭsio možna viarnuć. Heta budzie achviara, ničoha nia zrobiš…»
Spadar Ałkajeŭ pry hetym piša: dziaržaŭnaja systema stvaryła ŭ Biełarusi takija ŭmovy, što dapamahčy materyjalna čałavieku, jaki maje ŭ hetym patrebu, — vializnaja prablema. I padkazvaje, badaj, adzina mahčymaje ŭ dadzienaj sytuacyi vyjście:
«Paśla 9 hadoŭ pakutaŭ Mikałaj maje vostruju patrebu ŭ stacyjanarnym lekavańni pa cełym šerahu pakazańniaŭ. My nia možam adkryć dabračynny rachunak u biełaruskim banku, kab sabrać jamu hrošy — režym tut ža nakładzie na ich aryšt dy jašče abvinavacić Mikałaja ŭ nielehalnych dachodach. Možna adkryć rachunak u zamiežnym banku, ale kolki našych hramadzianaŭ ryzyknie dapamahčy, «zaśviaciŭšy» svaje asabistyja dadzienyja? Tamu my vyrašyli arhanizavać zbor srodkaŭ praz systemu WebMoney — hetaja lehalnaja, ale razam z tym ananimnaja systema elektronnych hrošaj paŭtara dziasiatka hadoŭ vykarystoŭvajecca dla bieznajaŭnych raźlikaŭ za tavary i pasłuhi ŭ Biełarusi, Rasiei, Ukrainie (usie padrabiaznaści — na sajtach www.webmoney.ru i www.wmtransfer.by). U adździaleńniach «Bielinvestbanku», «Biełarusbanku», «Biełprambudbanku», Mienskaha tranzytnaha banku, «Biełźniešekanombanku», «BiełŚvisBanku», «Alfa-Banku», banku «Maskva-Minsk», «Technabanku», «Biełahraprambanku», «Pryorbanku», a taksama sietki płaciožnych terminałaŭ OSMP BIEŁ i «Biełpošty» — techničnaje spryjańnie ŭ vykarystańni hetaj systemy».
Aleh Ałkajeŭ nahadvaje, što ŭ turmie Mikałaj Aŭtuchovič, baroniačy hodnaść nia tolki svaju, ale i inšych niezasłužana pakaranych, išoŭ na samyja radykalnyja kroki. Paśla vychadu na volu hramadztva pavinna hodna acanić jaho niazłomnuju pazycyju: «Jon zmahaŭsia nia tolki na voli, ale i ŭ turmie. Vyjaŭlaŭ karumpavanaść turemnaj administracyi, parušeńni vyznačanych zakonam umovaŭ utrymańnia źniavolenych. I patrabavaŭ tolki adnaho — spraviadlivaści. Spraviadlivaści, vyznačanaj zakonam. Jaho nia čuli i namahalisia złamać. U adkaz Mikałaj išoŭ na ŭsio bolš radykalnyja zachady, kab adstojvać svaje pravy: dźvie haładoŭki bolš za 70 dzion kožnaja, uskryćcio vienaŭ, parezy brušnoj połaści… Ale jon praciahvaŭ zmahacca i pieramoh, bo jaho nie złamali! Mikałaj zaŭsiody trymaŭsia na ŭśviedamleńni prostaha pryncypu, pra jaki pisaŭ tak: «Samaje hałoŭnaje — zaŭsiody zastavacca čałaviekam, u lubych umovach. Bo nielha potym budzie znoŭ chadzić na dźviuch nahach, kali stajaŭ na čatyroch…».
Rachunki dla zaličvańnia srodkaŭ na dapamohu Mikałaju Aŭtuchoviču možna pabačyć tut.
