Akredytavanyja hości i ŭdzielniki ČS-2014 u Minsku buduć biaspłatna karystacca hramadskim transpartam. Ab hetym siońnia žurnalistam paviedamiŭ mieniedžar Dyrekcyi pa praviadzieńni čempijanatu śvietu pa chakiei 2014 hoda Piotr Rabuchin.
«Dla aficyjnych udzielnikaŭ i haściej čempijanatu, u kaho budzie akredytacyjny bejdž, praduhledžany biaspłatny prajezd u haradskim hramadskim transparcie - u aŭtobusach, tralejbusach, tramvajach, mietro i haradskich elektryčkach. U hetym pytańni minskija ŭłady vyrašyli pajści nasustrač aficyjnym haściam turniru», - raskazaŭ Piotr Rabuchin.
Pavodle jaho słoŭ, naprykład, u Šviecyi ŭ čas praviadzieńnia čempijanatu śvietu pa chakiei minułaha hoda płacić za prajezd u hramadskim transparcie daviałosia ŭsim. Municypalitet horada nie staŭ rabić nijakich pabłažak, i z-za vysokaj cany za prajezd heta było dla mnohich istotnymi tratami.
Vyrašana pytańnie z transpartam dla aficyjnych delehacyj. Za kožnaj kamandaj na čempijanacie śvietu pa chakiei ŭ Minsku budzie zamacavany kamandny aŭtobus, lehkavy aŭtamabil, a taksama hruzavy - dla pieravozki bahažu. Z aeraporta da atelaŭ i z atelaŭ da spartyŭnych aren kamandy buduć pierajazdžać u supravadžeńni słužby biaśpieki. Usie kamandnyja aŭtobusy buduć vykanany ŭ firmiennym styli ČS-2014. U takim ža styli budzie aformleny i haradski transpart.