Uładzimir Kudzinaŭ z žonkaj
Były deputat Viarchoŭnaha Savieta 13-ha sklikańnia i były palitviazień, pradprymalnik Uładzimir Kudzinaŭ ad 1999 žyvie i pracuje ŭ Krymie. Kali my datelefanavalisia [u aŭtorak] sp. Kudzinavu, jon znachodziŭsia ŭ Sievastopali.
«Naša Niva»: Napružanaść na paŭvostravie adčuvajecca?
Uładzimir Kudzinaŭ: U horadzie, u prostych hramadzian nijakaj napružanaści nie adčuvajecca. Kali niejkija sutyčki i adbyvajucca, to kala ŭkrainskich vajskovych čaściej. Dla mianie vidavočna, što rasijskija vojski nie syduć z Kryma da praviadzieńnia refierendumu. Ludzi, viadoma, nie chočuć vajennych dziejańniaŭ. Razumnyja kažuć ab asablivym statusie horada Sievastopala. Tut pavinny prachodzić pramyja vybary, kab ludzi sami vybirali miascovuju ŭładu. Absalutna ŭsie zacikaŭlenyja ŭ demakratyčnaj abstanoŭcy ŭ rehijonie. Pa-druhoje, Sievastopalu varta nadać status svabodnaj ekanamičnaj zony, zrabić palohki dla viadzieńnia biznesu. Kab siudy, nie bajučysia, mahli jechać ukrainskija, rasijskija, amierykanskija biznesmieny.
«NN»: Situacyja ŭ Sievastopali i astatnim Krymie mocna roźnicca?
UK: Kaniečnie. Pa maich nazirańniach, u Sievastopali ŭvachodžańnie ŭ skład Rasii ci abviaščeńnie niezaležnaści Kryma padtrymała b kala 70% žycharoŭ, tady jak na astatnim paŭvostravie — nie bolej za 40%.
«NN»: Jakija čakańni ad refierendumu?
UK: Ja pierakanany, kali budzie try varyjanty: a) uvachodžańnie Kryma ŭ skład Rasii, b) abviaščeńnie niezaležnaści, v) zastacca ŭ składzie Ukrainy, to nivodny ź ich nie nabiare bolš za 50% hałasoŭ vybarcaŭ. Ale važna, jak ličać, a nie jak hałasujuć. Patrebna, kab volevyjaŭleńnie hramadzian było svabodnym, a nie pad dułami rasijskich aŭtamataŭ, a tak moža być. Treba ŭtrymlivać situacyju tak, kab nie zahinuli ludzi.
«NN»: Miascovyja biełarusy jak reahujuć na padziei?
UK: U mianie jość niekalki znajomych etničnych biełarusaŭ, jakija atrymali ŭkrainskaje hramadzianstva. Dyk jany vystupajuć, kab raniejšy stan rečaŭ zastavaŭsia. Jany nie zacikaŭlenyja ŭ adździaleńni Kryma ad Ukrainy.
«NN»: Pavieličeńnie rasijskaj prysutnaści adčuvajecca?
UK: Nu tak, kala niejkich pastoŭ, bazaŭ. Ale ŭ haradach — nie skazaŭ by. Tyja ž administracyjnyja budynki ŭ Simfieropali zachoplivali ludzi biez apaznavalnych znakaŭ. Na ich nie było rasijskaj vajskovaj formy. Heta taksama razdražniaje ludziej. Kali Pucin abviaściŭ vajnu słavianskamu śvietu, to niachaj tak i kaža, a nie chavajecca za ludźmi ŭ maskach.
«NN»: A pahrozy izalacyi ŭ vypadku adździaleńnia Kryma ludzi nie bajacca? Krym — heta turystyčny rehijon, ci niama ryzyki zastacca sioleta biez turystaŭ?
UK: Kali nie budzie vajennych dziejańniaŭ, to biełarusy, ukraincy, ruskija ŭsio adno pajeduć u Krym na adpačynak. Siezon tut pačynajecca ŭ pačatku maja, mahčyma, da hetaha času niešta ŭžo atrymajecca razrulić. Mnohija kažuć, što im biez roźnicy, jakaja budzie ŭłada — ruskaja, ukrainskaja ci amierykanskaja, — hałoŭnaje, kab usio było demakratyčna. Nichto ž nie abaraniaje Janukoviča, usie viedajuć, što jon złodziej, bačyli jahonyja pałacy.
«NN»: Dyk jaki Vaš prahnoz?
UK: Niešta prahnazavać vielmi ciažka. Vidavočna siońnia, što Rasija nie adstupić. Mnie padabajecca reakcyja ŭkrainskaha boku, što jany sprabujuć nie nahniatać situacyju, spyniajuć usie pravakacyi.
