Saviet Antykryzisnaha fondu (AKF) JeŭrAzES adkłaŭ razhlad pytańnia ab pradastaŭleńni Biełarusi šostaha tranšu finansavaha kredytu (440 młn. dołaraŭ) u suviazi ź nievykanańniem dziesiaci pakazčykaŭ dziejnaj stabilizacyjnaj prahramy.
Takoje rašeńnie było pryniataje 27 śniežnia pa vynikach trynaccataha (zavočnaha) pasiadžeńnia Savieta fondu. Biełaruskamu boku rekamiendavana raspracavać i realizavać miery, nieabchodnyja dla vykanańnia ŭsich pakazčykaŭ šostaha tranšu, uzhadniŭšy hetyja miery i terminy ich vykanańnia ź Jeŭrazijskim bankam raźvićcia (JEABR), jaki kiruje srodkami AKF, u miežach novaha lista ab namierach. Pry hetym saviet AKF praciahnuŭ stabilizacyjnuju prahramu da 1 lipienia, a datu dastupnaści finansavaha kredytu da 31 śniežnia 2014 hoda. Pytańnie ab vydzialeńni Biełarusi šostaha tranšu saviet AKF znoŭ razhledzić u trecim kvartale 2014 hoda.
«Rašeńnie savieta fondu pra adterminoŭku šostaha tranšu finansavaha kredytu AKF nie vypadkovaje, bo rašeńniem savieta ŭ červieni hetaha hoda byŭ uzhodnieny śpis z 14 pakazčykaŭ, vykanańnie jakich było nieabchodna dla vydzialeńnia šostaha tranšu. Na 1 kastryčnika — kantrolnuju datu šostaha tranšu — z 14 pakazčykaŭ 10, u tym liku piać kantrolnych, nie dasiahnutyja», — paviedamiŭ namieśnik staršyni praŭleńnia Jeŭrazijskaha banka raźvićcia Siarhiej Šatałaŭ.
Jon rastłumačyŭ, što da nievykanańnia pakazčykaŭ pryviało spałučeńnie jak źniešnich faktaraŭ, «jakija niepaduładnyja ŭradu i Nacyjanalnamu banku Biełarusi», hetak i ŭnutranych, narodžanych krokami biełaruskich uładaŭ.
«Da liku źniešnich faktaraŭ adnosiacca tarmažeńnie ekanamičnaha rostu ŭ Rasii, efiekty ad ustupleńnia Rasii ŭ SHA, što źniziła mytnuju abaronu rynkaŭ Mytnaha sajuza i asłabiła kankurentazdolnaść biełaruskich eksparcioraŭ, a taksama padziei na rynku kalijnych uhnajeńniaŭ», — zaznačyŭ Šatałaŭ.
Adnak, padkreśliŭ jon, «nie mienšuju rolu ŭ źnižeńni mižnarodnych reziervaŭ i paharšeńni płaciežnaha bałansu Biełarusi adyhraŭ praciah palityki kredytnaj ekspansii, tempy jakoj nie źnizilisia ŭ paraŭnańni z 2012 hodam, roŭna jak i pavyšeńnie zarabotnaj płaty tempami, jakija značna apiaredžvali rost pradukcyjnaści pracy».
Tamu łahična, kanstatavaŭ Šatałaŭ, što Saviet AKF pryniaŭ rašeńnie praciahnuć kredytnuju prahramu, «kab dać uładam Biełarusi mahčymaść da siaredziny 2014 hoda dasiahnuć zhadanych kantrolnych pakazčykaŭ».
Kiraŭnictva Jeŭrazijskaha banka raźvićcia vykazvaje nadzieju, što realizacyja płana sumiesnych dziejańniaŭ biełaruskaha ŭrada i Nacbanka dazvolić u nastupnym vykanać pakazčyki kredytnaj prahramy.
«Pryniaty 10 kastryčnika ŭradam i Nacyjanalnym bankam Respubliki Biełaruś płan sumiesnych dziejańniaŭ źjaŭlajecca krokam u pravilnym kirunku. My bačym pieršyja pazityŭnyja vyniki jaho realizacyi: asłab śpiekulatyŭny nacisk na kurs nacyjanalnaj valuty, zatarmaziłasia źmianšeńnie mižnarodnych reziervaŭ. Kali hetyja pazityŭnyja vyniki buduć zamacavanyja jašče bolš rašučymi krokami ŭładaŭ RB ciaham pieršaha paŭhodździa 2014 hoda, usie pakazčyki šostaha tranšu mohuć być dasiahnutyja», — paviedamiŭ BiełaPAN Siarhiej Šatałaŭ.
Pry hetym jon zaznačyŭ, što Jeŭrazijski bank raźvićcia praciahnie «aktyŭnuju pracu z uładami Biełarusi pa pryviadzieńni stabilizacyjnaj prahramy, padtrymanaj finansavym kredytam Antykryzisnaha fondu, da paśpiachovaha zaviaršeńnia».
Nahadajem, pačatak dziejnaj prahramy Biełarusi z Antykryzisnym fondam JeŭrAzES byŭ pakładzieny dva z pałovaj hady tamu. 4 červienia 2011 hoda saviet AKF uchvaliŭ vydzialeńnie Biełarusi finansavaha kredytu ŭ abjomie 3 młrd. dołaraŭ ZŠA, srodki nakiroŭvalisia na stabilizacyju płaciežnaha bałansu i pavyšeńnie kankurentazdolnaści biełaruskaj ekanomiki.
Mierkavałasia, što kredyt budzie vydzialacca šaściu tranšami ciaham 2011—2013 hadoŭ u adpaviednaści z vykanańniem etapaŭ kredytnaj prahramy biełaruskim uradam. Minfin Biełarusi čakaŭ, što šosty tranš kredytu pastupić u krainu ŭ listapadzie 2013 hoda. Piaty tranš kredytu Antykryzisnaha fondu JeŭrAzES Biełaruś, nahadajem, atrymała 30 krasavika hetaha hoda.
U acency fondu ab vykanańni ŭmoŭ piataha tranšu paviedamlałasia, što pazyčalnik nie vykanaŭ niekalki indykatyŭnych pakazčykaŭ. U pryvatnaści, Biełaruśsiu nie byli vykananyja indykatyŭnyja pakazčyki pa vieličyni pastupleńniaŭ srodkaŭ ad pryvatyzacyi, pa ŭzroŭni kampiensacyi nasielnictvam koštu pasłuh ŽKH i hramadskaha transpartu. Aprača taho, metavy ŭzrovień pa roście patrabavańniaŭ bankaŭ da inšych siektaraŭ ekanomiki (indykatyŭny pakazčyk) pa vynikach 2012 hoda ŭdvaja pieravysiŭ zapłanavany ŭzrovień.
U 2013 hodzie paśla pieramoŭ ź biełaruskimi ŭładami pakazčyk pa roście kredytavańnia ekanomiki byŭ pieraviedzieny ŭ razrad kantrolnych i ŭstanoŭleny na ŭzroŭni 1,5% za miesiac. Na dumku pradstaŭnikoŭ fondu, abmiežavańnie tempaŭ kredytavańnia spryjaje stabilizacyi płaciežnaha bałansu i strymlivańniu inflacyi.
