Vybuch adbyŭsia ŭ tralejbusie niepadalok ad rynku ŭ Dziaržynskim rajonie Vałhahrada (Rasija) ranicaj u paniadziełak, 30 śniežnia. Pavodle papiarednich źviestak, zahinuli 15 čałaviek.
Vybuch adbyŭsia ŭ tralejbusie №15 niepadalok ad rynku ŭ Dziaržynskim rajonie Vałhahrada, vybuchovaj chvalaj vybiła šyby ŭ susiednich damach. Pierapoŭnieny tralejbus ruchaŭsia ŭ hadzinu pik sa spalnaha rajona ŭ centr horada.
U administracyi horada paviedamili, što vybuch adbyŭsia ŭ toj momant, kali «piatnaccaty» pačaŭ ruch ad prypynku «Kačynskaje vučylišča».
Tralejbus išoŭ ad balnicy, u jakoj znachodzilisia paciarpiełyja va ŭčorašnim terakcie.
Miesca zdareńnia ačeplena. Kinołahi i vybuchatechniki ahladajuć prylehłuju terytoryju, u pryvatnaści, rynak, jaki taksama začynieny.
Handlovyja centry začyniajucca pa rasparadžeńni MUS pa Vałhahradskaj vobłaści, kab paźbiehnuć mahčymaha paŭtareńnia terarystyčnych aktaŭ.
Pavodle apošnich źviestak, zahinuli 14 čałaviek. Źviestki pra paciarpiełych adroźnivajucca, siarod paranienych adnahadovaje dzicia, jaho stan vielmi ciažki. Špitalizavany 25 čałaviek.
Paviedamlajecca taksama, što žychary Vałhahrada stali admaŭlacca ad pajezdak na hramadskim transparcie.
Mnohija dabirajucca da pracy pieššu. Žychary horada śpiešna pierahladajuć płany na zimovyja vakacyi, admaŭlajučysia ad zapłanavanych zaharadnych pajezdak, zdajuć raniej nabytyja kvitki na transpart i naviedvańnie kulturnych mierapryjemstvaŭ.
1-3 studzienia ŭ Vałhahradzie abvieščana žałoba, usie masavyja zabaŭlalnyja mierapryjemstvy ŭ horadzie admienienyja.
Vybuch adbyŭsia mienš čym praz sutki paśla teraktu na vakzale horada, u vyniku jakoha zahinuli 17 čałaviek i bolš za 40 paciarpieli.
