29 śniežnia paśla troch sutak administracyjnaha aryštu vyjšaŭ na volu mahiloŭski aktyvist Abjadnanaj hramadzianskaj partyi Anton Kascoŭ.
Kastryčnickim sudom Mahilova jaho asudzili jak arhanizatara niesankcyjanavanaha masavaha mierapryjemstva. Aktyvista źvinavacili ŭ stvareńni supołki «Stop-strach» ŭ sacyjalnaj sietcy «Ukantakcie».
U joj źmiaščalisia zakliki da praviadzieńnia štotydniovych akcyjaŭ pratestu aŭtamabilistaŭ. Pieršaja mieła adbycca 27 śniežnia.
24 śniežnia na Antona skłali pratakoł administracyjnaha pravaparušeńnia jak na ŭdzielnika, ale 26 śniežnia pratakoł pierapisali. U jahonych dziejańniach supracoŭniki Kastryčnickaha adździełu milicyi Mahilova ŭhledzieli arhanizacyju masavaha mierapryjemstva.
Abvinavačvańni Anton Kascoŭ nie pryznaje i zajaŭlaje, što nie arhanizoŭvaŭ akcyi, a tolki vykazvaŭ svaju hramadzianskuju pazycyju na sajcie.
«Arhanizoŭvali jaje inšyja ludzi. Akcyi pa sutnaści i nie było. Ja nie zaklikaŭ ludziej vychodzić z transparantami. U maich skazach było napisana, što varta zachoŭvać hramadzki paradak i nie skandavać, nia chłopać, a pavodzić siabie, nie parušajučy zakon.
Ja padavaŭ cytaty na sajcie, jakija byli napisanyja da mianie ŭ inšych sacyjalnych sietkach.
Pra toje, što sa mnoj adbyłosia ja nie škaduju, ale treba bolš abačliva napierad siabie pavodzić.
U takoj sytuacyi moh apynucca luby, chto adstojvaŭ pazycyju balšyni niazhodnych ludziej. Ja nie čakaŭ, što mianie pasadziać, ale toje, što mianie ŭsio ž pasadzili — heta całkam naturalnaja reakcyja ŭładaŭ.
Sudziła mianie sudździa Siedalcova. Bolš za ŭsio jaje cikavili maje adkazy pa pytańnie pra partyju.
Jana zajaviła, što AHP — partyja, jakaja vystupaje suprać dziejnaj ułady i ja nieprymirymy praciŭnik ułady», — kazaŭ Anton Kascoŭ paśla vychadu ź izalatara časovaha ŭtrymańnia
24 śniežnia supołka była vydalenaja. U toj ža dzień milicyjanty zabrali ŭ Antona kamputar nibyta dla prahladu pierapiski. Jon zastajecca ŭ Kastryčnickim adździele milicyi Mahilova. Pra toje, što aktyvista sudzili, paviedamiła jahonaja maci.
Sustrakać aktyvista na voli pryjšli jahonyja baćki, adnapartyjcy, a taksama jahonyja kalehi ź inšych partyjaŭ.
