Biełaruskija ŭłady, uvodziačy padatak na ŭładalnikaŭ aŭtamabilaŭ, spasyłajucca na suśvietny dośvied. U jakich krainach jość padatak na aŭtamabil?
ZŠA
Tut transpartnaha padatku jak asobnaha zboru niama: jon uklučany ŭ košt paliva (prykładna 15 % ad cany). To bok, čym vyšej raschod benzinu abo salarki ŭ mašyny, čym čaściej jana vyjaždžaje na darohu i čym bolš adpaviedna vykidvaje škodnych rečyvaŭ u atmasferu, tym bolš u vyniku zapłacić jaje haspadar. Uładalniki elektramabilaŭ transpartny padatak nia płaciać. Prykładna 60% sabranych takim čynam srodkaŭ nakiroŭvajecca ŭ federalny darožny fond, a 40% iduć u darožnyja fondy štataŭ. Pryčym usie hetyja hrošy vydatkoŭvajucca vyklučna na budaŭnictva i ramont aŭtamahistralaŭ.
Vialikabrytanija
Darožny padatak spahaniajecca z uładalnikaŭ mašyn, jakija pracujuć na benzinie, dyzelnym palivie i pryrodnym hazie. Ułaśniki elektramabilaŭ, hibrydnych madelaŭ, a taksama aŭtamabilaŭ z abjomam ruchavika mienš adnaho litra jaho nia płaciać. Pamier padatku vyznačajecca dziaržaŭnym ahienctvam, jakoje rehistruje aŭtamabili i vydaje paśviedčańni kiroŭcy ŭ zaležnaści ad abjomu ruchavika. Naprykład, uładalnik aŭtamabila z 1,4-litrovym ruchavikom płacić u hod kala 175 funtaŭ, a za pazadarožnik z matoram 3,5 ł. daviadziecca vykłaści bolš za 300 funtaŭ. Prykładna 80% ad srodkaŭ, sabranych u vyhladzie darožnaha padatku, idzie na finansavańnie darožnaj haliny. Astatniaja častka — na roznyja ekalahičnyja prahramy, źviazanyja pieravažna z palapšeńniem jakaści pavietra.
Francyja
Tut dziejničaje dźviuchstupienievaja systema padatkaabkładańnia aŭtamabilistaŭ. Pry rehistracyi novaj mašyny ŭładalnik płacić adnarazovy padatak u zaležnaści ad abjomu i mahutnaści ruchavika. Naprykład, za madel z 1,6-litrovym matoram treba zapłacić 200-250 eŭra, a za abjom bolš za try litry — kala 1100 eŭra. Sabranyja srodki iduć na finansavańnie darožnaj haliny. Druhaja stupień — štohadovy padatak, jaki vyličvajecca ŭ zaležnaści ad taho, kolki hramaŭ vuhlakisłaha hazu, pavodle dadzienych vytvorcy, aŭtamabil vykidvaje ŭ atmasferu za 100 kilametraŭ. Staŭki prahresiŭnyja — čym «brudniejšy» vychłap, tym bolš daviadziecca zapłacić. A voś uładalniki mašyn, jakija na 100 kilametraŭ vykidvajuć mienš za 200 hramaŭ SO2, ad hetaha padatku vyzvalenyja. Hetyja zbory iduć na finansavańnie prahram pa zachavańni čyścini pavietra i hleby.
Niamieččyna
Pry vyznačeńni pamieru padatku ŭličvajecca abjom ruchavika i čyścinia vychłapu. Niezaležna ad hodu vypusku mašyny za kožnyja 100 kub. sm. abjomu treba zapłacić 2 eŭra dla benzinavych matoraŭ i 9 eŭra — dla dyzelnych. Akramia taho, pa 2 eŭra štohod aŭtaŭładalnik pavinien płacić za kožny hram vuhlakisłaha hazu, jaki vypracoŭvaje jaho mašynaj (pa dadzienych vytvorcy) na 100 km. Hetym zboram nie abkładajucca haspadary ekalahičnych madelaŭ, jakija vypracoŭvajuć mienš za 120 h. CO2 na 100 km. Całkam ad vypłaty transpartnaha padatku vyzvalenyja ŭładalniki elektramabilaŭ.
Čechija
U Čechii niama padatku na aŭtamabil dla fizyčnych asobaŭ. Zbor uviedzieny tolki dla pradprymalnikaŭ, jakija vykarystoŭvajuć svaje aŭtamabili ŭ kamercyjnych metach.
Japonija
Tut pry kupli novaj mašyny nieabchodna zapłacić padatak prykładna 5 % ad jaje koštu. Nastupny płaciož — pry pastanoŭcy aŭtamabila na ŭlik. Suma raźličvajecca, zychodziačy z abjomu ruchavika i masy aŭtamabila. Za nievialikuju małalitražku naličać kala $ 54, a «krosover» paciahnie amal u 10 razoŭ bolej. Paśla takaja ž suma spahaniajecca z aŭtaŭładalnika štohod. U adroźnieńnie ad mnohich inšych krainaŭ, u Japonii srodki ad darožnaha padatku nakiroŭvajucca nie na budaŭnictva tras abo ekalahičnyja prahramy, a na raźvićcio perspektyŭnych raspracovak u aŭtamabilnaj pramysłovaści.
Kitaj
Pa analohii z ZŠA transpartny padatak uklučany ŭ košt paliva (kala 20 % ad cany). Akramia taho, pry kupli novaha aŭtamabila, vypuščanaha ŭ KNR, uładalnik płacić 10 % ad jaho koštu. Dla madelaŭ zamiežnaj vytvorčaści staŭka vyšej — 40%. Padatkovyja zbory z aŭtamabilistaŭ pieraličvajucca na raźvićcio darožnaj infrastruktury.
Rasija
Pamier transpartnaha padatku zaležyć tolki ad mahutnaści ruchavika. Pryčym na federalnym uzroŭni ŭstanoŭleny tolki bazavyja staŭki padatku — rehijanalnyja ŭłady majuć prava sami pavialičvać abo pamianšać ich (maksymalna ŭ dziesiać razoŭ), a taksama ŭvodzić lhoty dla ŭłaśnikaŭ toj ci inšaj katehoryi aŭtamabilaŭ. Srodki ad padatkaŭ pastupajuć u federalny i rehijanalny darožnyja fondy, ź jakich finansujecca budaŭnictva, ramont i rekanstrukcyja tras, piša aŭtamabilnaja hazeta Kłakson.
