Ad ranicy 1 žniŭnia staryja televizary žycharoŭ Asipoviččyny nie pakažuć nivodnaha kanała. Na hety dzień prymierkavana adklučeńnie efirnaha anałahavaha telebačańnia ŭ pieršym z rehijonaŭ Biełarusi. Praz paru miesiacaŭ čarha na adklučeńnie dojdzie da Žłobina i Babrujska.
Vykanańnie płana pa pieravo-dzie krainy na ličbavaje viaščańnie adkładałasia niekalki razoŭ, ale narešcie pačynaje realizoŭvacca. Jakija pieravahi atrymajuć hledačy? Raniej anteny kala ich televizaraŭ dazvalali złavić try-čatyry kanały. Naprykład, pad Asipovičami možna było hladzieć «Biełaruś-1», STB i «RTR-Biełaruś».
Ciapier ža ŭdasca ŭbačyć u palepšanaj jakaści karcinki i huku vosiem telekanałaŭ i adzin radyjokanał. Što dla hetaha treba zrabić?
Novy televizar — i prablem niama
Kali ŭ vas stajać antena i televizar, jaki padtrymlivaje standart DVB-T i farmat ściskańnia MPEG-4 AVC/H.264, to bolš ničoha kuplać nie treba, dastatkova zapuścić aŭtamatyčny pošuk kanałaŭ.
Bolšaść novych madelaŭ — i zamiežnych, i «Haryzontaŭ» z «Viciaziami» — z hetym standartam pracujuć. Televizary ź nievialikim ekranam (kala 20 calaŭ) kaštujuć ad 2 miljonaŭ rubloŭ.
Novy farmat za piać chvilin
Kali ž televizar stary i patrebny standart nie padtrymlivaje, daviadziecca nabyć śpiecyjalnuju prystaŭku — ličbavy ciunier. Ich vytvorčaść arhanizavaŭ «Viciaź» i jašče niekalki biełaruskich kampanij. Samaja niedarahaja prystaŭka, naprykład, «Viciaź» DTR-816 FTA, kaštujuć kala 350—400 tysiač rubloŭ. Mierkavańni pra jakaść hučać, miakka kažučy, supiarečlivyja.
Možna padabrać i zamiežnyja anałahi za tuju ž canu. Ale źviartajcie ŭvahu, kab na televizary i prystaŭcy byli adnolkavyja razdymy.
Samo padklučeńnie «pa-novamu» zojmie niekalki chvilin. Štekier anteny treba dastać z televizara i ŭstavić u prystaŭku. A prystaŭku i televizar złučyć miž saboj drotam, jaki bu-dzie iści ŭ kamplekcie. Paśla čaho ŭklučyć na błakitnaj skryni režym AV i nacisnuć na pošuk kanałaŭ.
Ale biez anteny i ŭ vypadku z prystaŭkaj nie abyścisia.
Viaskovy varyjant
Efirnym telebačańniem karystajucca pieradusim u vioskach i małych haradach, dzie niama kabielnaha viaščańnia. Usio ž vosiem kanałaŭ — heta niamnoha ŭ paraŭnańni ź niekalkimi dziasiatkami prahram, jakija tranślujuć kabielnyja apieratary. Dy i ŭ vioskach mnohija staviać sabie spadarožnikavyja talerki, kab stać niezaležnym ad hustaŭ Biełteleradyjokampanii.
Hrafik adklučeńnia anałahavaha telebačańnia na bližejšy čas
2013
1 žniŭnia — Asipovičy
1 kastryčnika — Žłobin, Babrujsk
1 listapada — Kaściukovičy
2014
1 krasavika — Bierazino, Šarkaŭščyna, Łuniniec, Homiel,
15 maja — Mahiloŭ, Viciebsk, Pietrykaŭ
1 červienia — Brahin, Brest, Drahičyn.
- Dastupnymi ŭ ličbavym farmacie buduć «Biełaruś 1», «Biełaruś 2», «Biełaruś 3», ANT, STV, «NTV-Biełaruś», «RTR-Biełaruś», «Mir», a taksama Pieršy kanał Biełaruskaha radyjo
- U čas pierachodu krainy na efirnaje ličbavaje televiaščańnie pracuje daviedkavaja słužba, dastupnaja pa karotkim numary 172