16 maja 2011 hoda za Płošču byli asudžanyja Iryna Chalip (2 hady abmiežavańnia voli z adterminoŭkaj na taki ž termin), Siarhiej Marcaleŭ (2 hady ŭmoŭna z vyprabavalnym terminam na taki ž termin). Praz čatyry dni Siarhiej Vaźniak, Andrej Dźmitryjeŭ, Vital Rymašeŭski, Alaksandr Fiaduta atrymali pa 2 hady ŭmoŭna, Uładzimir Niaklajeŭ — 2 hady źniavoleńnia z adterminoŭkaj na 2 hady, Nasta Daškievič (Pałažanka) — 1 hod ŭmoŭna z vyprabavalnym terminam na hod.
Pałažanka adbyła termin jašče letaś. Ale da siońnia ŭ jaje zastajecca sudzimaść. Astatnija tolki rychtujucca pazbavicca nakładzienych na ich abmiežavańniaŭ.
Chalip i Niaklajeva čakajuć novyja sudy. Juryst Pavieł Sapiełka ličyć, što pry adsutnaści parušeńniaŭ padčas adterminoŭki naŭrad ci budzie pakarańnie pryviedziena ŭ vykanańnie. Ale ŭ lubym vypadku pavinna być rašeńnie suda. Novyja pracesy pavinny adbycca nie paźniej za daty kasacyjnych skarhaŭ: u Chalip heta 20 lipienia, Niaklajeva — 22-ha.
«Nichto nie kaža, kali sud: vidać, nie ličać nieabchodnym», — adznačyŭ Uładzimir Niaklajeŭ.
Što tyčycca asudžanych umoŭna biez adterminoŭki, novyja sudy ŭ ich mahčymyja, ale nie abaviazkovyja. Pa słovach Andreja Dźmitryjeva, heta budzie vyrašać inśpiekcyja pa nahladzie: kali ŭ ich buduć patyńni, to mohuć nastojvać na novym sudzie.
U vypadku Siarhieja Marcaleva 20 lipienia ź jaho pavinny źniać abmiežavańni: pakolki za vyprabavalny termin pakarańnie nie było vykanana. Ale zastaniecca sudzimaść. Pa słovach Siarhieja, dla jaho važniejšaja nie sudzimaść, a toje, što zmoža naviedać siabroŭ za miažoj, čaho byŭ pazbaŭleny ŭvieś hety čas.
«Kali raniej dastatkova było lubovaha administracyjnaha spahnańnia, kab adpravicca za kraty, to ź lipienia takoj pahrozy nie budzie».
Sioleta na svabodu paśla zakančeńnia terminaŭ źniavoleńnia pavinny vyjści Źmicier Daškievič (u žniŭni), Alaksandr Franckievič (u vieraśni), Pavieł Sieviaryniec (u kastryčniku). U minułym, adnak, termin źniavoleńnia Daškieviča byŭ padoŭžany. Nichto nie moža harantavać, što toje samaje nie zdarycca jašče raz.
