Tony parkietnaj doški na 13 tysiač jeŭra rassypalisia pa travie ŭ Baranavickim rajonie ŭ vyniku aŭtaavaryi, paviedamlaje «Intex-press».
Kab darahi łaminat nie raściahnuli miascovyja žychary, na miescy zdareńnia pakinuli dziažuryć supracoŭnika DAI.
Avaryja zdaryłasia 15 maja na trasie Brest-Minsk-miaža RF niepadalok ad vioski Lasnaja Baranavickaha rajona. Hruzavy aŭtamabil «Volva», jaki naležyć rasijskaj firmie, jechaŭ z Bresta ŭ Rasiju.
Kali mašyna prajazdžała pa terytoryi Baranavickaha rajona, łopnuła pravaje piaredniaje koła, aŭtamabil źjechaŭ u kiuviet i, prajechaŭšy niekalki mietraŭ pa nievialikaj prasiecy, upiorsia ŭ drevy.
Kiroŭca, na ščaście, nie paciarpieŭ. A voś 22 tony parkietnaj doški koštam 13 tysiač jeŭra, jakija jon vioz, rassypalisia pa travie.
«Kiroŭca paviedamiŭ ab tym, što zdaryłasia ŭ firmu, i jamu na padmohu dasłali rabotnikaŭ. Adnak, kab sabrać takuju kolkaść łaminatu, patrebnyja nie adny sutki. Miž tym miascovyja žychary, jakija ŭbačyli, što zdaryłasia, tut ža stali padychodzić i cikavicca, čyj hruz. Uvohule, kab darahi łaminat nie raściahnuli za noč, było pryniata rašeńnie pakinuć supracoŭnika DAI dziažuryć na miescy zdareńnia», — paviedamili ŭ DAI.
Pa fakcie avaryi pravodzicca pravierka, suma škody vyśviatlajecca.
