Hetym razam administracyja pradpryjemstva nastojliva šukaje parušeńni ŭ pracy pamočnika ekskavatarščyka Leanida Dubanosava, jaki źjaŭlajecca siabram miascovaj supołki Biełaruskaha niezaležnaha prafsajuza.
Na minułym tydni na pracoŭnaje miesca Dubanosava rehularna prychodziła admysłovaja kamisija, jakaja ciaham adnaho dnia prymusiła rabočaha skłaści dvie tłumačalnyja daviedki pra nibyta vyjaŭlenyja chiby ŭ jahonaj pracy. Pa słovach Dubanosava, parušeńni składalisia ŭ tym, što «kabiel nie tam lažaŭ, rukavicy praterminavanyja, anučy nie tam lažali — zajmali prachod».
Leanid Dubanosaŭ, jaki pracuje na «Hranicie» amal 20 hadoŭ i dahetul nie mieŭ nijakich zaŭvah ad kiraŭnictva pradpryjemstva, ličyć, što ciapierašniaja aktyŭnaść administracyi źviazanaja z tym, što jahony pracoŭny kantrakt skančajecca 2 traŭnia.Pakolki Leaind źbirajecca sychodzić u adpačynak, spahnanieńnie jamu chočuć vynieści zaraz, kab paźniej (za miesiac da zakančeńnia kantrakta) abvieścić, što pracoŭnyja adnosiny ź im nie buduć praciahnutyja
Raniej Leanidu Dubanosavu nieadnarazova prapanoŭvali dabraachvotna admovicca ad udziełu ŭ niezaležnym prafsajuznym ruchu, adnak jon rabić heta nie źbirajecca. Paźniej pamočnika ekskavatarščyka papiaredzili, što ŭ vyniku praciahu prafsajuznaj dziejnaści Leanida pazbaviać pracy na «Hranicie».
— Načalnik hranitnaha karjera Juryj Suško ŭžo paŭhody mnie kazaŭ, što kali nie vyjdu ź niezaležnaha prafsajuza, to mianie zvolniać. Tak prosta i kazaŭ, tolki prasiŭ, kab nikomu nie raspaviadaŭ, maŭlaŭ, kab daŭ dapracavać da piensii. A dla Suško takoje niehałosnaje zadańnie daŭ hienieralny dyrektar pradpryjemstva Eduard Haŭryłkovič.
Leanid Dubanosaŭ budzie abskardžvać niezakonnyja spahnańni, ale ŭ jaho niama viery na abjektyŭny razhlad spravy, uličvajučy papiaredni vopyt jaho zvolnienych siabraŭ pa prafsajuzu. Ich čaćviara nie pasłuchałasia šelmavańnia kiraŭnictva i nie vyjšła ź niezaležnaha prafsajuzu: Stachajevič, Paŭłoŭski, Pašečka i Karyšaŭ. Ciapier čarha za Dubanosavym, jaki taksama nie źbirajecca pakidać niezaležny prafsajuz. Chacia ciapier jość što stračvać. Dziakujučy zmahańniam siabraŭ niezaležnaha prafsajuza, zarobak na pradpryjemstvie vyras z 3–4 da 15 młn. rubloŭ.
