Minsuviazi: 1,2 młn. biełarusaŭ karystajucca kabielnym telebačańniem

U Biełarusi naličvajecca 1,2–1,3 młn. abanientaŭ kabielnaha telebačańnia. Pra heta paviedamiŭ pieršy namieśnik ministra suviazi i infarmatyzacyi Ivan Rak.

«U cełym prykładna 2 młn. chatnich haspadarak majuć mahčymaść prymać roznyja formy płatnaha telebačańnia i nie zaležać ad „efiru“. Choć, viadoma, tam jość niejkija ŭkrapvańni z efirna-kabielnym viaščańniem, ale dźvie traciny nasielnictva Biełarusi majuć dostup da kabielnaha viaščańnia», — adznačyŭ pieršy namministra suviazi i infarmatyzacyi 14 lutaha padčas anłajn-kanfierencyi na sajcie BiełTA.

Pry hetym Ivan Rak nie zmoh acanić, kolki jakich televizijnych pryjomnikaŭ ekspłuatujecca. «Skazać, što jany ličbavyja, anałahavyja ci jašče niejkija, davoli ciažka.

Park televizaraŭ abnaŭlaŭsia, ale miescami sustrakajucca vielmi rarytetnyja asobniki, jakija praciahvajuć pracavać. Adnaznačna acanić, kolki jakich televizijnych pryjomnikaŭ ekspłuatujecca, ciažka», — skazaŭ Ivan Rak.

Pavodle jaho słoŭ, samaja tannaja prystaŭka dla pryjomu ličbavaha telebačańnia kaštuje kala 270 tys. rubloŭ.

Nabyvać prystaŭki možna jak u mahazinach, tak i praz adździaleńni RUP «Biełpošta».

Anałahavaje telebačańnie ŭ Biełarusi pačnuć adklučać užo z druhoha paŭhodździa.

Raniej za inšych poŭnaściu piarojduć na «ličbu» Asipovičy, dzie anałahavyja telepieradatčyki vyklučać 1 žniŭnia. U 2014 hodzie heta adbudziecca ŭ piaci abłasnych centrach, a da 17 lipienia 2015 hoda anałahavy TB-sihnał adklučać na ŭsioj terytoryi Biełarusi. Zamiest jaho biełarusy ŭžo mohuć prymać da vaśmi biaspłatnych teleprahram pieršaha ličbavaha multypleksu, da jakich dadasca jašče 28 płatnych kanałaŭ druhoha i treciaha słajoŭ.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH