Užo siońnia vykapać uručnuju mahiłu moža kaštavać svajakam pamierłaha kala 700 tys. rubloŭ.
Adpaviednaje rašeńnie № 4036 Minharvykankam pryniaŭ jašče napiaredadni Novaha hoda, a dakładniej 27 śniežnia. Adnak jano ŭstupaje ŭ siłu z momantu apublikavańnia, što adbyłosia tolki ŭčora, 23 studzienia, na Nacyjanalnym pravavym partale Respubliki Biełaruś.
U dakumiencie vykładzienyja ŭ novaj redakcyi hraničnyja maksimalnyja taryfy na sacyjalna značnyja pasłuhi, pradstaŭlenyja ŭ dadatku 2 da rašeńnia Minharvykankama ad 16 červienia 2011 № 1745.
U vyniku hraničnyja maksimalnyja taryfy na rytualnyja pasłuhi ŭ Minsku pavialičanyja adrazu na 80%. Kali raniej hranična mahčymy taryf za kapańnie mahiły ŭ zimovy čas uručnuju (kapańnie, zasypańnie, apuskańnie truny ŭ mahiłu) składaŭ 380 tys. rubloŭ, to ź siońniašniaha dnia maksimalnaja cana moža skłaści 684 tys. rubloŭ. U letni čas takaja pasłuha budzie kaštavać maksimum 324 tys. rubloŭ.
Vyrab truny z abiŭkaj zamiest 120 tys. rubloŭ moža kaštavać 216 tys. rubloŭ. Ale heta nie ŭličvajučy cany materyjałaŭ. Zhodna z novym rašeńniem Minharvykankama ŭstanoŭlena, što pry akazańni rytualnych pasłuh pa vyrabie trunaŭ, mahilnaha słupka abo kryža asnoŭnyja i dapamožnyja materyjały apłačvajucca zakazčykam dadatkova.
Ciažka zrazumieć, čym abjektyŭna abhruntavana takoje rezkaje pavyšeńnie rytualnych taryfaŭ, uličvajučy, što pavodle aficyjnych dadzienych uzrovień inflacyi ŭ 2012 hodzie skłaŭ krychu bolš za 20%.
Mahčyma, adkaz na hetaje pytańnie daść toj fakt, što asnoŭny pastaŭščyk rytualnych pasłuh u Minsku — Kamunalnaje ŭnitarnaje pradpryjemstva «Śpieckambinat KBA», jakoje naležyć Minharvykankamu.
Mabyć, haradskija čynoŭniki padumali i vyrašyli, što niadrenna było b padzarabić na takoj śpiecyfičnym nivie. Miortvyja ž nie ŭzvyjuć, a svajaki pamierłaha čałavieka, vidavočna, nie buduć u trahičny momant dumać pra novyja taryfy.
