Staršynia Minharvykankama Mikałaj Ładućka źviarnuŭsia da kiraŭnictva ZAT «Inteka» (Maskva) pa padtrymku ŭ praviadzieńni konkursu pa vypracoŭcy kancepcyi zabudovy rajona «Minsk-Sici».
Jaho sustreča z kiraŭnictvam rasijskaj kampanii adbyłasia 23 studzienia ŭ Minsku, paviedamiŭ Ładućka na pres-kanfierencyi ŭ haradskoj ratušy.
«Hetaja tema (zabudova rajona „Minsk-Sici“) z paradku dnia nie źniataja, jana aktualnaja. Dziełavy centr stalicy z žyllom, infrastrukturaj dazvolić pryciahnuć siudy dadatkovyja kampanii ŭ śfiery biźniesu, finansaŭ, mižnarodnaha handlu — heta toje, da čaho imknucca harady i krainy, jakija siabie pavažajuć», — adznačyŭ Ładućka. Pavodle jaho słoŭ, Minsk pavinien maksimalna vykarystoŭvać svajo hieahrafičnaje stanovišča i «tyja ŭmovy dla žyćcia nasielnictva, jakija stvorany na našaj terytoryi».
Zajaŭki na ŭdzieł u raspracoŭcy kancepcyi zabudovy «Minsk-Sici» padali 15 kampanij, ź ich siem paćvierdzili svoj udzieł.
Kiraŭnik Minharvykankama patłumačyŭ, što «heta kampanii z suśvietnym imiem» z Čykaha, Łondana, Vašynhtona,
Ńju-Jorka, Sietła, a taksama rasijskija kampanii. «Heta budzie sur`iozny mižnarodny konkurs, jaki dazvolić vypracavać kancepcyju budučyni. Heta hrandyjoznaja horadabudaŭničaja zadača», — skazaŭ Ładućka.
16 lutaha 2012 hoda Alaksandr Łukašenka pryniaŭ rašeńnie skasavać dahavor ź mižnarodnaj hrupaj kampanij «Itera», acaniŭšy tempy budaŭnictva «Minsk-Sici» jak niezdavalniajučyja: z pačatku budaŭnictva kompleksu ŭ 2009 hodzie było asvojena tolki kala 0,5% zajaŭlenaha ab`iomu inviestycyj u 25,6 trłn. rubloŭ.
Zbudavańnie rajona «Minsk-Sici» pačałosia na terytoryi staličnaha aeraporta «Minsk-1» i raźmieščanaha pobač avijaramontnaha zavoda. Na 318 hiektarach pieršapačatkova płanavałasia pabudavać 3,3 młn. kv. m žyłoj i kamiercyjnaj nieruchomaści, a taksama ab`iekty sacyjalnaj infrastruktury. Realizavać prajekt płanavałasia da 2020 hoda.
BiełaPAN
Chočaš padzialicca važnaj infarmacyjaj ananimna i kanfidencyjna?
Pišycie redaktaru «Našaj Nivy» ŭ TH
