Jak u Jeŭropie: pa Minsku pajechaŭ dvuchpaviarchovy ekskursijny aŭtobus — foty i aŭdyjo 14

Aŭtobus dajazdžaje da simvała Minsku.

Na druhim paviersie nizkaja stol. Kab pierasoŭvacca, davodzicca sahnucca.

Afarmleńnie zvonku - pa-rasijsku.

Kanałaŭ vosiem, biełaruskamoŭny - pieršy.

Ramont aŭtobusa kaštavaŭ kala $50 tysiač.

Na vuzkich pałosach praśpiektu składana łaviravać navat vopytnamu kiroŭcu.

Navušnikaŭ pakul što chapaje na ŭsich.

Punkt adpraŭleńnia — vakzał.

U pieršy rejs rušyli žurnalisty.

Minsk z vyšyni druhoha pavierchu.

Spalnyja rajony nie zastalisia pa-za ŭvahaj.

«Cepočnyja turysty», jakija naviedvajuć Minsk, ciapier zmohuć atrymać asałodu ad ahladnaj ekskursii pa stalicy na dvuchpaviarchovym aŭtobusie.

Turystyčnaje ahienctva «Drom-Tur» sumiesna ź Minharvykankamam zapuściła haradski ekskursijny maršrut Minsk City Tour.

Na rejs vyjechaŭ adrestaŭravany aŭtobus MAN 1980 hodu vypusku. Kaliści jon vaziŭ kupcoŭ na «Ždanovičy», paśla jeździŭ u Homieli i Mazyry. Jaho źbiralisia śpisvać na mietałałom, ale za $50 tysiač ŭdałosia ŭdychnuć u aŭtobus novaje žyćcio.

Karespandenty «NN» trapili na pieršy rejs i palubavalisia Minskam z vyšyni druhoha pavierchu.

10 dalaraŭ za padarožža

U pieršy čas aŭtobus budzie abjazdžać stalicy čatyry razy ŭ dzień. La čyhunačnaha vakzała ŭ jaho možna budzie sieści ŭ 11.00, 13.30, 16.00 i 18.30. Da kropki startu aŭtobus vierniecca praź dźvie hadziny.

Voś tolki pramiežkavych prypynkaŭ pakul nie praduhledžana.

«Ujavicie, što vy vyjšli zimoj na Bataničnym sadzie. A nastupny aŭtobus tolki praź dźvie z pałovaj hadziny. — tłumačyć namieśnik dyrektara turfirmy „Drom-Tur“ Dźmitry Vaškievič. — Turyst stolki čakać nie budzie».

Miarkujecca, što naleta na maršrucie źjavicca jašče adzin aŭtobus, taki ž samy MAN. Tady zapracujuć i prypynki. Pa słovach pradstaŭnikoŭ turfirmy, ich budzie vosiem. Kožnuju abstalujuć śpiecyjalnym stendam z raskładam ruchu ekskursijnaha aŭtobusa.

Maršrut aŭtobusa prosty — spačatku turystaŭ paviazuć pa praśpiekcie Niezaležnaści da Nacyjanalnaj biblijateki. Dalej — Usichśviackaja carkva i spalny rajon Uschod. Adtul aŭtobus viartajecca na praśpiekt i viartajecca ŭ centr, zvaročvajučy ŭ bok Niamihi. Pa praśpiekcie Pieramožcaŭ možna budzie dajechać da «Minsk-Areny» i viarnucca da vakzała.

Ciapier da hrašovaha pytańnia.

Z darosłych buduć brać pa 90 tysiač rubloŭ, a ź dziaciej — pa 50 tysiač.

Ci mnoha heta? Dla paraŭnańnia, u jeŭrapiejskich stalicach takija tury kaštujuć 15–30 jeŭra.

Kožny pieršy paniadziełak miesiaca arhanizatary buduć ładzić dabračynny dzień — usie zaroblenyja na biletach hrošy buduć achviaravanyja dzieciam.

Biełaruskaja mova pa zmoŭčańni

Padčas ruchu padarožniki zmohuć prasłuchać tekst ekskursii. U navušnikach možna nastroić adzin z vaśmi kanałaŭ.

Siarod movaŭ pradstaŭlenyja biełaruskaja (pa zmoŭčańni, kanał № 1), rasiejskaja, anhlijskaja, niamieckaja, francuzskaja, italjanskaja i ispanskaja. Na vośmym kanale dla dzietak, jakija stomiacca ad tekstu, hučać dziciačyja pieśni.

Na rekłamnym buklecie na aŭtobusie namalavanyja jašče ściažok Izraila, Abjadnanych Arabskich Emirataŭ i Kitaja. Movy hetych krainaŭ mohuć źjavicca nastupnymi.

Darečy, tranślitaracyja na aficyjnym buklecie niasłušnaja — «Nezavisimosti Square», «Pobedy Park»… Na zaŭvahu karespandenta «NN» pradstaŭnica «Drom-Tura» adkazała, što

tekst pamianiajuć, kali «ŭsie kančatkova vyrašać, jaki varyjant pravilny».

Što da aŭdyjoźmiestu ekskursii, to jon nie napružvaje. Bazavuju infarmacyju turyst atrymaje, ale niejkich dadatkovych cikavostak ci haradskich lehiendaŭ daviedacca nie ŭdasca.

«Na płoščy Niezaležnaści ŭ pačatku 1990-ych pravodzilisia šmattysiačnyja demanstracyi ŭ padtrymku niezaležnaści i demakratyčnych pieratvareńniaŭ», —

hučyć u pačatku ekskursii. Što praŭda, hramatyčnych pamyłak u biełaruskamoŭnaj viersii pakul što chapaje. Jość i rusizmy nakštałt «čatyrochźviozdačny».

Namieśnik dyrektara turfirmy «Drom-Tur» Dźmitry Vaškievič zapeŭniŭ, što nijakaj prablemy pieraahučyć tekst nie budzie. «Ci była sproba paklikać na ahučku kahości ź viadomych biełarusaŭ?» — «Ideja była, ale realizoŭvać nie stali».

Pieršy blin

Nie varta čakać na Minsk City Tour i adkrytych aŭtobusaŭ. Ale pryčyna nie ŭ klimacie. Arhanizatary maršrutu praličyli, što

pry adkrytym dachu pasažyry, staŭšy va ŭvieś rost, zmohuć daciahnucca da tralejbusnych pravadoŭ — niebiaśpiečna.

Dźmitry Vaškievič pryznajecca, što mnohija prablemy bačnyja ŭžo ciapier, ale spadziajecca ich vypravić. Naprykład, stałaje miesca dla stajanki na vakzale dla ekskursijnaha aŭtobusa tak i nie znajšłosia, tak i tak pryparkavanaja ahromnistaja kolkaść lehkavikoŭ i aŭtobusaŭ.

U lubym vypadku

isnavańnie takoha aŭtobusa — važnaja reč dla raźvićcia turystyčnaha patencyjału Minska.

U inšych jeŭrapiejskich stalicach za kožnaha pasažyra kankurujuć nie dźvie i navat nie try kampanii-pieravozčyki sa svaimi aŭtobusami, čaściakom pierapoŭnienymi. «Adnojčy ja sustrakaŭ Novy hod u Talinie, — uzhadvaje Dźmitry Vaškievič. — Dyk tam 1 studzienia na samy pieršy ekskursijny rejs pryjšli 12 čałaviek! Prytym što aŭtobus u histaryčny centr Talina nie zajazdžaje, a abjazdžaje jaho vakoł».

Jahor Marcinovič, fota Siarhieja Hudzilina

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH