Не трэба баяцца гета, калі толькі ў гета можа захавацца беларускасць дыскусійны артыкул: абмяркоўвайце 221

Вечная тэма беларускіх дыскусій — мова, культура, ідэнтычнасць. Адзін бок прасоўвае думку, што расейскамоўныя беларусы — гэта таксама беларусы і што расейскамоўная культура Беларусі — гэткая ж беларуская. Раяць выкарыстоўваць расейскую мову як прыладу ў барацьбе за Беларусь.

Згодная, што расейскамоўныя — гэта таксама беларусы.

Згодная, што расейскую мову трэба актыўна выкарыстоўваць у прапагандзе бел. культуры і гісторыі. Тым самым уцягваючы расейскамоўных у нацыянальны дыскурс.

Супярэчнасць выклікае толькі тэза аб беларускасці расейскамоўнай культуры.

Гэтая тэза актуальна толькі для тых, хто жыве ў Беларусі.

Для жыхароў нават суседніх краін (не кажучы пра далейшую Еўропу) мова чалавека — гэта сінонім яго нацыянальнасці.

Таму ўсе расейскамоўныя з Беларусі за мяжой успрымаюцца як расейцы. Таксама і іх расейскамоўныя творы належаць да культуры Расеі, яе заходняй правінцыі.

Апалагеты расейскай мовы ў Беларусі пужаюць белмоўных культурным гета, ізаляцыяй ад сусветных культурных працэсаў, загніваннем.

Але паглядзім, ці, напрыклад, жыды, якія амаль тысячу гадоў пражылі ў гетах, за гэтыя стагоддзі адсталі ў развіцці?

Негры ў ЗША доўга жылі ў культурным і расавым гета, а негрыцянская культура, якая выйшла з гэтага гета (рэп, хіп-хоп, эр-эн-бі) сталі папулярныя ва ўсім свеце.

Індзейцы ў ЗША, калі б не жылі ў гетах-рэзервацыях, даўно распусціліся б у эмігранцкім моры.

А ўзяць нашых цыганоў: калі б не імі створанае своеасаблівае гета, асіміляцыя зрабіла б сваё ў першае стагоддзе іх прыбыцця на нашыя землі.

Адкрытасць на свет не заўсёды добра.

Не трэба гнацца за прызнаннем свету.

Трэба проста жыць у сваім свеце белмоўнай культуры, берагчы яго ад знешніх загрозаў, ператвараючы чужое на сваё.

Калі знешняму свету белмоўная культура будзе цікавая, ён сам павернецца да нас. Калі не, нас гэта не павінна асабліва хваляваць.

Мы, белмоўныя, павінны проста жыць так, як нам падабаецца,

мець свае святы, тусоўкі, ТВ і радыёканалы, ствараць сваю незалежную культуру. І не звяртаць увагу, падабаецца гэта расейскамоўным ці не. Бо, у адрозненне ад расейскамоўных, нам не трэба тлумачыць нікому, што мы не рускія.

І хай мы з гета і нас мала, шанцаў застацца беларусамі ў глабальным свеце ў нас у сто разоў болей, чым у нашых расейскамоўных суседзяў-беларусаў.

Не можа быць побач з вялікай Расеяй маленькага рускамоўнага народа «тожа беларусаў». Яму наканавана немінучае растварэнне ў «рускім моры».

А «белмоўныя негры» з гета і праз сотні гадоў будуць заставацца беларусамі.

Паўліна Моргун, Баранавічы

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ