U atmaśfiernym kutku Minska znosiać staruju zabudovu
Rajon viełazavoda niekalki hadoŭ žyvie ŭ čakańni pieramien. Jašče ŭ 2017 hodzie byŭ prezientavany płan rekanstrukcyi «Praletarki», jaki praduhledžvaŭ znos dziasiatka žyłych dvuch– i trochpaviarchovikaŭ. Niekatoryja damy ŭ rajonie ŭžo adsialili, adnak budynki nichto nie čapaŭ. I voś niadaŭna miascovyja žychary zaŭvažyli, što ŭ dvarach zjaviłasia budaŭničaja technika. Tut užo źnieśli adzin z byłych internataŭ. Realt.by pahladzieŭ, jak prachodzić znos.
11.09.2023 / 11:17
Zavadskija pasiołki (aŭtazavoda, traktarnaha zavoda i viełazavoda) zjavilisia ŭ Minsku paśla vajny. Zhodna z kancepcyjaj «harady ŭ horadzie» prajektavali takija pasiołki razam z usioj nieabchodnaj infrastrukturaj — dziciačymi sadami, paliklinikami, damami kultury i stadyjonami. Mienavita taki «haradok» uźnik i pobač z Partyzanskim praśpiektam. Žyłyja damy ŭ 2-3 pavierchi ŭźviali na vulicach Viełazavodskaj, Nachimava, Strałkovaj.
U 2017 hodzie žycharam rajona prezientavali płan rekanstrukcyi «Praletarki». Znošany žyły fond prapanoŭvałasia źnieści i zabudavać šmatpaviarchovymi damami, handlovymi centrami i parkinhami. Niahledziačy na toje, što staražyłam rajona prajekt nie mocna spadabaŭsia, u 2018 hodzie jaho ź niekatorymi źmienami zaćvierdzili.
Za minułyja hady haradskija ŭłady adsialili žyłyja dvuchpaviarchoviki na niacotnym baku Nachimava, a taksama byłyja internaty na Strałkovaj, Stanisłaŭskaha, Rybałki i Nachimava. U pustych budynkach zabili vokny, zavaryli padjezdy, ale dalej sprava nie ruchałasia.
I voś niadaŭna ŭ dvary na vulicy Nachimava zjaviłasia budaŭničaja technika. Pieršaj pad buldozier adpraviŭsia były budynak internata dla rabotnikaŭ motaviełazavoda pad numaram 13a. Ciapier ad trochpaviarchovaha doma zastałasia tolki hruda budaŭničaha śmiećcia.
Vierahodna, zusim chutka pad znos pojdzie i susiedni budynak (taksama były internat). Pobač ź im zaraz składujuć śmieccie. Adznačym, što znos u rajonie vulic Rybałki, Viełazavodskaj i Nachimava, a taksama padrychtoŭka vyzvalenych placovak pad novaje žyllovaje budaŭnictva praduhledžany inviestycyjnaj prahramaj Minska na 2023 hod.
Zhodna z raniej zaćvierdžanym płanam na vulicy Nachimava płanavałasia źnieści damy № 11, 13, 15, 13a i 17a.
Miesca adsielenych damoŭ pavinna zaniać šmatpaviarchovaja zabudova. Pra heta ŭ červieni hetaha hoda kazaŭ kiraŭnik administracyi Leninskaha rajona Raman Mielnik.
U administracyi Leninskaha rajona pa telefonie detali płanavanaj žyłoj zabudovy žurnalistam raskryvać nie stali. U rajvykankamie skazali, što zamoŭcam budaŭnictva terytoryi budzie vystupać UKB Minharvykankama.
U rajonie taksama praciahvajecca i budaŭnictva ad kamiercyjnaha zabudoŭščyka — na miescy źniesienych vytvorčych pabudoŭ uzvodzicca žyły kompleks «Antonaŭski kvartał».
Čytajcie taksama: