Kolkaść ździełak

U 2022 hodzie kolkaść ździełak z kvaterami ŭ Minsku i ŭ Biełarusi dasiahnuła rekordnych značeńniaŭ. Usiaho pa krainie kupili 55 605, a ŭ Minsku — 17 985 kvater. Za 8 miesiacaŭ 2023 hoda biełarusy praviali ŭžo bolš za 36 tysiač ździełak pa krainie i 12,3 tysiačy ździełak u stalicy. 

Kali paraŭnać vyniki ciapierašnich 8 miesiacaŭ z tym ža pieryjadam minułaha hoda, to vychodzić, što ŭ Minsku praviali ŭžo amal na 900 ździełak bolš, a pa krainie — na 512. Heta značyć, što danyja pa krainie biez stalicy krychu adstajuć ad letašnich, ale varta adznačyć, što Nacyjanalnaje kadastravaje ahienctva zakančvaje padlik ździełak za papiaredni miesiac prykładna da siaredziny nastupnaha. Heta značyć, danyja za žnivień jašče nie poŭnyja. Pry hetym žnivień 2023 pa krainie ŭžo roŭny letašniamu. 

Ahulny rost dasiahajecca šmat u čym z-za staličnaha rynku, jon składaje da 37% ad usich ździełak. A ŭ 6 z 8 minułych miesiacaŭ pakazčyki značna pieraŭzychodziać letašnija. 

U pieršuju čarhu na rynak nieruchomaści paŭpłyvała źnižeńnie stavak pa kredytnych prahramach.

Tolki za lipień banki vydali nasielnictvu bolš za 1,1 miljarda rubloŭ. I kali paraŭnać dynamiku vydačy kredytaŭ za 7 miesiacaŭ 2023 hoda z tym ža letašnim pieryjadam, to vyjdzie, što biełarusy ŭziali na 2,36 miljarda rubloŭ bolš, čym u 2022 hodzie. 

Za apošnija 8 miesiacaŭ staŭki pa kredytach źnižalisia 6 razoŭ, zjavilisia novyja prahramy i ŭmovy dla roznych vidaŭ nieruchomaści. Naprykład, dla «Paŭnočnaha bieraha» zapuścili ŭnikalnuju kredytnuju prahramu terminam na 30 hadoŭ. 

Z-za źnižeńnia stavak kredytami stali karystacca tyja hrupy nasielnictva, jakija raniej nie mahli raźličvać na adabreńnie banka z-za nieadpaviednaści dachodaŭ. Tamu kredytami stali čaściej karystacca ŭ ździełkach, a popyt na nieruchomaść nie źniziŭsia, niahledziačy na toje, što košty praciahnuli raści. 

Košty

Ź vieraśnia 2022 pa vierasień 2023 cana kvadratnaha mietra ŭ Minsku vyrasła na $155: z $1397 da $1562. Bolš aktyŭna ceny raśli ź listapada 2022 da lutaha 2023, kali kvadrat dadaŭ $91. Heta byŭ pieradnavahodni pieryjad, kali nieruchomaść chočuć paśpieć pradać i kupić pierad śviatam. 

Nastupnaja sieryja rostu pačałasia ŭ krasaviku i praciahnułasia da žniŭnia, tady mietr padaražeŭ jašče na $58. Heta supravadžałasia piacirazovym źnižeńniem staŭki refinansavańnia da kanca červienia, jaki razam z hetym pakazvaje pikavaje značeńnie pa kolkaści ździełak. 

Da vieraśnia košt mietra źniziŭsia na $10 adnosna žniŭnia, ale pa adnym źnižeńni nielha mierkavać ab źmienie tendencyi. Popyt na kvatery nie mianiajecca, a stymulavać ceny mohuć novyja prahramy kredytavańnia, novyja budaŭničyja prajekty, čarhovaje źnižeńnie staŭki abo pavieličeńnie terminaŭ vypłaty kredytu. 

Jak źmianiłasia cana ŭ rehijanalnych centrach ź vieraśnia 2022 pa vierasień 2023

Brest — z $838 da $892 za mietr;

Hrodna — z $725 da $792 za mietr;

Viciebsk — z $631 da $704 za mietr;

Mahiloŭ — z $705 da $777 za mietr;

Homiel — z $658 da $719 za mietr.

Što budzie dalej

Na rynak z časam moža paŭpłyvać niadaŭni ŭkaz, pavodle jakoha bolš nielha pradavać kvatery z-za miažy pa davieranaści, jakaja zroblena nie ŭ Biełarusi. Heta skarocić kolkaść mahčymych kvater u prodažy. A z-za taho, što popyt nie mianiajecca, a kredyty dastupnyja, heta moža padšturchnuć čarhovy rost koštaŭ.

Čytajcie taksama:

Hrodziency ad śvitanku vystrojvajucca ŭ čerhi, kab nabyć novyja kvatery ad dziaržzabudoŭščyka. U čym pryčyna?

Inšaziemcy raskuplajuć biełaruskuju nieruchomuju majomaść

Na bierazie vadaschovišča Drazdy pabudavali niezvyčajny budynak. Što ŭ im

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?