Ci zmohuć USU paśpiachova kontratakavać na Danbasie? Tłumačyć ekśpiert z ZŠA
Ale ci mohuć ukrainskija siły pierajści ŭ vialikaje kontrnastupleńnie, ci ŭsio budzie abmiažoŭvacca łakalnymi kontratakami? Radyjo Svaboda raspytała pra heta Džordža Barasa ź Instytuta vyvučeńnia vajny (ISW) — daśledčaha instytuta ŭ Vašynhtonie.
18.05.2022 / 00:37
— My bačym ciapier, što ŭkrainskija siły dzie-nidzie pierachodziać u kontrnastupleńnie…
— Ukrainie treba pieratvaryć hetyja kontrataki ŭ bolš maštabnyja kontrnastupleńni. My bačyli niekalki miescaŭ i vypadkaŭ, kali ŭkrainskim vojskam heta ŭdałosia zrabić. Adnak spačatku ja chaču rastłumačyć, što z-za padabienstva słoŭ roźnica pamiž niekatorymi z kontratak, jakija charaktaryzujuć jak kontrnastupleńnie, zdajecca nievialikaj.
Ale vajskovyja analityki asablivuju ŭvahu nadajuć adroźnieńniu pamiž kontratakaj i kontrnastupleńniem.
Kontrataka — heta miera mienšaha maštabu, zvyčajna na taktyčnym uzroŭni, z metaj viarnuć nievialikuju terytoryju, kab palepšyć svajo taktyčnaje stanovišča.
Tady jak kontrnastupleńnie — apieratyŭnaja miera vyšejšaha ŭzroŭniu, dzie metaj źjaŭlajecca viartańnie bolšaj častki terytoryi, jakaja maje mety jašče bolš vysokaha značeńnia.
Niekatoryja z hetych vypadkaŭ viartańnia ŭkrainskimi vojskami terytoryi byli acharaktaryzavanyja jak kontrnastupleńnie ŭkrainskich vojskaŭ, u toj čas jak jany na samaj spravie byli kontratakami. Što sapraŭdy ciapier važna, dyk heta toje, kab ukraincy mieli mahčymaść pieratvaryć niekatoryja z hetych mienšych atak u sapraŭdy vialikaje kontrnastupleńnie.
Kali pahladzieć na chod ciapierašnich kontratak, to heta prosta zachop adnaho, dvuch ci troch siołaŭ adnačasova. Adnak ukrainskija siły jašče nie dasiahnuli taho momantu, kali ŭkraincy mohuć pa-sapraŭdnamu mocna adsunuć zakarenienyja rasijskija pazicyi.
— Ukraina pastupova adciskaje rasijskija vojski ad Charkava…
— Što tyčycca vyciaśnieńnia rasijan z Charkava i nabližeńnia da ŭschodu, to heta budzie vielmi važna. Naša kamanda vielmi ŭvažliva sočyć za rasijskimi šlachami zabieśpiačeńnia, jakija iduć ad Biełharada (rasijski horad pablizu ŭkrainskaj miažy) da Iziuma, jaki zatym złučajecca z Danieckam i Łuhanskam.
Heta budzie vielmi važna, i my vierym, što bitvy, u jakija ciapier ustupajuć ukraincy, stvarajuć umovy dla baraćby ŭ Iziumie i stanuć vyrašalnymi na ciapierašnim etapie vajny va Ukrainie.
Budzie cikava pahladzieć, nakolki efiektyŭnymi mohuć być ukrainskija kontrataki suprać takich pazicyj Rasii, dzie jany ŭžo ŭmacavalisia i akapalisia. Ja skažu, što niekatoryja hieahrafičnyja asablivaści palahčajuć ukraincam kontrataki, u toj čas jak inšyja — nie. Naprykład, abaraniacca lahčej, čym nastupać. Tamu bačyć, jak ukraincy ažyćciaŭlajuć paśpiachovuju abaronu — heta nie toje ž samaje, što skazać, što ŭvieś hety pośpiech abaviazkova pieraraście va ŭdałaje nastupleńnie pa vyzvaleńni abo viartańni ŭkrainskaj terytoryi.
Tak vyhladaje Charkaŭ paśla rasijskich abstrełaŭ
— Ahułam ukrainskija vojski dziejničajuć prafiesijna, ci nie tak?
— Adna ź cikavych dynamik, jakuju my bačym u chodzie hetaj vajny, zaklučajecca ŭ tym, što
ŭkraincy, zdajecca, davoli efiektyŭna dajuć adpor rasijskim siłam u miescach, dzie jany praźmierna pašyryli svaje linii zabieśpiačeńnia i dzie ich tyłavyja rajony nie abaronienyja.
Ukraincy mohuć pravodzić rejdy jak na bienzavozy, tak i łahistyčnyja kanvoi, i da taho padobnaje. Adnak ukraincy mienš efiektyŭnyja ŭ baraćbie z umacavanymi rasijskimi pazicyjami, dzie rasijanie majuć dobryja linii suviazi i zabieśpiačeńnia.
My taksama zaŭvažyli hetuju dychatamiju ŭ efiektyŭnaści pracy ŭkraincaŭ u sielskaj miascovaści, dzie nie vielmi šmat nasielenych punktaŭ, i pracaj u haradskich umovach. Ukraincy, mahčyma, zmohuć adbić rasijskija siły, jakija dziejničajuć u vioskach i na ŭskrainach, niepasredna za miežami bujnych haradoŭ. Heta daje mahčymaść pravodzić vyviedku, heta daje im mahčymaść vyznačyć, dzie znachodziacca rasijskija padraździaleńni, a zatym prymianić suprać ich artyleryju i rakiety.
Tym nie mienš, u vypadku traplańnia ŭ hustanasielenyja rajony tempy bajoŭ i tempy prasoŭvańnia dla luboha boku značna pamianšajucca. Ukraincy jašče nie prademanstravali zdolnaści zajści ŭ kantralavany voraham haradski asiarodak i znajści sposab vycieśnić hetyja siły.
— Jakaja situacyja z rasijskimi vojskami, u jakim jany stanie?
— Pakolki tempy prasoŭvańnia rasijan zamarudzilisia z-za źmianšeńnia kolkaści rasijskich vojskaŭ, im davodzicca pierahrupavacca. Pavodle našaj acenki, u rasijan zastałosia vielmi mała efiektyŭnaj bajavoj siły, jakuju jany mohuć prymianić.
Mabilizacyja rasijskaha hramadstva i patencyjny pryzyŭ, chutčej za ŭsio, nie stvorać nijakaj značnaj bajavoj siły, i ich praktyka pryzyvu na vajskovuju słužbu taksama nie daść hetaha.
Adnak toje ž tyčycca i ŭkraincaŭ, ich siły taksama skaračajucca. Užo bolš za 70 dzion jany zaciata vajuiuć, i naniasieńnie škody rasijskim čaściam robić mienš efiektyŭnymi i sami ŭkrainskija siły. Temp i dasiahnieńni kožnaha z bakoŭ zapavolvajucca. Asabliva heta prykmietna na ŭschodzie Ukrainy i na Danbasie.
Adna važnaja reč, jakuju my nazirajem, — heta ryzyka taho, što Pucin paśpiachova dabjecca spynieńnia ahniu na vyhadnych Rasii ŭmovach, što zamacuje jahonyja niezakonnyja dasiahnieńni na ŭschodzie Ukrainy i ŭ paŭdniovaj častcy.
Rasijskija tanki kala Maryupala. Krasavik 2022 hoda
— Ci realna dasiahnuć pahadnieńnia pra spynieńnie bajavych dziejańniaŭ?
— Zaniepakojenaść vyklikaje toje, što kali Kreml budzie nastojvać na spynieńni ahniu, to zachodnija dziaržavy abo peŭnyja lidary abo arhanizacyi mohuć prajavić schilnaść aŭtamatyčna začapicca za heta, pakolki heta prapanova budzie rasceńvacca jak sposab pakłaści kaniec hvałtu. Zaniepakojenaść — u tym, što jak tolki Kreml pačnie takuju hulniu, moža ŭźniknuć mižnarodny cisk na prezidenta Ukrainy Uładzimira Zialenskaha, kab jon pahadziŭsia na hetyja ŭmovy.
— Ci vyčerpvajucca ŭ Rasii reziervy?
— Što tyčycca taho, ci zmohuć rasijanie pierahrupavacca i adnavić bolš efiektyŭnuju bajavuju moc, to ŭ karotkaterminovaj pierśpiektyvie — heta značyć na praciahu nastupnych šaści-dvanaccaci miesiacaŭ — dakładna nie.
Cykł pryzyŭnoj słužby ŭ Rasii ŭ zvyčajnych umovach źjaŭlajecca takim, što siaredniestatystyčny sałdat prachodzić prykładna čatyry-šeść miesiacaŭ bazavaj padrychtoŭki, plus paru dadatkovych miesiacaŭ śpiecyjalizavanaj padrychtoŭki, a zatym prykładna praz 8—10 miesiacaŭ zastupaje na sapraŭdnuju słužbu. A na navučańnie jakasnaha sałdata treba bolš za 8—10 miesiacaŭ.
Ukraincy ŭ značnaj stupieni razhramili rasijski aficerski korpus, ad bataljona da ŭzroŭniu armii i ŭsich pramiežkavych ešałonaŭ, tamu dla adnaŭleńnia patencyjału čałaviečaha kapitału Rasii spatrebicca cełaje pakaleńnie. Namahańniaŭ rasijan sabrać siły z Abchazii, Siryi, Livii i inšych miescaŭ ciapier prosta niedastatkova, kab abjadnać efiektyŭnyja siły.
Takim čynam, kali Pucin choča mieć mahčymaść adnavić hetuju vajnu na svaich umovach, jon, mahčyma, addaść pieravahu doŭhačasovamu zamacavańniu dasiahnieńniaŭ, jakija jon maje ciapier, adnaŭleńniu svaich siłaŭ lubym sposabam, i pasprabuje nanieści ekanamičnuju škodu Ukrainie, błakujučy jaje vychad da Čornaha mora, tak, jak heta jość ciapier. A tady spadziavacca, što paśla zmoža zaviaršyć pačataje.