У студзені-жніўні 2010 года доля стратных прамысловых прадпрыемстваў у Беларусі складала 14,8% ад іх агульнай колькасці. За такі ж перыяд 2009 года гэты паказчык быў на ўзроўні 19,2%.
Як паведамляе Нацыянальны статыстычны камітэт, па выніках васьмі месяцаў 298 прамысловых прадпрыемстваў спрацавалі са стратамі на агульную суму 513,4 млрд. рублёў (у студзені-жніўні 2009 года — 728,8 млрд.).
Найбольшыя сумы чыстых страт адзначаны
ў прадпрыемстваў электраэнергетыкі (136,2 млрд. рублёў), машынабудавання і металаапрацоўкі (109,7 млрд. рублёў), харчовай прамысловасці (58,8 млрд. рублёў), прамысловасці будматэрыялаў (51,3 млрд. рублёў) і лёгкай прамысловасці (44,4 млрд. рублёў).
Рэнтабельнасць рэалізаванай прадукцыі, работ, паслуг прамысловых прадпрыемстваў за студзень-жнівень 2010 года склала 9,9% (за студзень-жнівень 2009 года — таксама 9,9%), рэнтабельнасць продажу — 7,6% (7,4%).
Вышэйшая, чым у сярэднім па прамысловасці, рэнтабельнасць рэалізаванай прадукцыі, работ, паслуг за студзень-жнівень 2010 года адзначана на прадпрыемствах медыцынскай прамысловасці (29,2%), гарнашахтнага і гарнаруднага машынабудавання (28,1%), хімічнай прамысловасці (22,6%), пад’ёмна-транспартнага машынабудавання (20,7%), гарбарнай, футровай, абутковай прамысловасці (19%), каляровай металургіі (17,4%), прыборабудавання (15,8%), харчасмакавай прамысловасці (14,8%), трактарнага і сельскагаспадарчага машынабудавання (14,7%), паліграфічнай прамысловасці (14,2%).
Ніжэйшы за сярэдні паказчык ўзровень рэнтабельнасці ў электраэнергетыцы (0,5%), падшыпнікавай прамысловасці (1%), лесанарыхтоўчай (2,1%), нафтахімічнай (2,3%), цэлюлозна-папяровай (2,6%), шкляной і фарфора-фаянсавай прамысловасці (3,3%), чыгуначным машынабудаванні (3,9%), тарфяной прамысловасці (4,4%), прамысловасці будаўнічых матэрыялаў (4,9%), мукамольна-крупяной і камбікормавай прамысловасці (5,3%), чорнай металургіі (5,8%).
Марына Носава, БелаПАН
Хочаш падзяліцца важнай інфармацыяй ананімна і канфідэнцыйна?
Пішыце рэдактару «Нашай Нівы» ў ТГ
