Анатоль Васільеў. Фота: СК
У 2023 годзе, гаворыць Васільеў, следчыя галоўнага ўпраўлення працавалі па справах, заведзеных па фактах хабарніцтва, злоўжывання і перавышэння паўнамоцтваў службовымі асобамі такіх прадпрыемстваў, як «Нафтан», «Газпром трансгаз Беларусь», МТЗ, БелАЗ, «МАПІД», «Атлант» і іншых.
Да крымінальнай адказнасці прыцягнуты прадстаўнікі мясцовых выканаўчых органаў, а таксама праваахоўнікі, кажа Васільеў.
Ён распавёў, што нядаўна скончана папярэдняе расследаванне і накіравана ў суд крымінальная справа ў дачыненні да васьмі службовых асоб і аднаго работніка баранавіцкага ААТ «558 Авіяцыйны рамонтны завод» у атрыманні хабару і незаконнага ўзнагароджання ў перыяд са жніўня 2016 года па люты 2022 года на агульную суму большую за 670 тысяч рублёў. Хабар быў ад прадстаўнікоў замежных камерцыйных кампаній.
У ходзе следства быў накладзены арышт на маёмасць абвінавачаных агульным коштам звыш 2,7 млн рублёў.
Таксама цяпер следчыя разбіраюцца па крымінальнай справе, узбуджанай у дачыненні да службовых асоб аднаго з найбуйнейшых прадпрыемстваў па вытворчасці і перапрацоўцы сельскагаспадарчай прадукцыі па факце атрымання незаконнага грашовага ўзнагароджання ў памеры 300 000 еўра за лабіяванне інтарэсаў камерцыйнай арганізацыі пры правядзенні закупак абсталявання. Васільеў прадпрыемства не назваў.
Таксама з рэзанансных і вялікіх спраў, скончаных увосень, ён вылучыў справу аб хабары і злоўжыванні службовымі паўнамоцтвамі ў адносінах да службовых асоб аднаго з найбуйнейшых банкаў. Паводле СК, да крымінальнай адказнасці прыцягнуты трое асоб. «Супрацьпраўная дзейнасць імі распачата ў 2018 годзе і палягала ў выкарыстанні грашовых сродкаў банка для правядзення асабістых спекулятыўных аперацый. Фігурантамі атрыманы незаконны даход на суму не меншую за Br1,5 млн, з якіх для паспяховага функцыянавання распрацаванай злачыннай схемы ў якасці хабараў былому старшыні Праўлення банка перададзена больш за Br600 тысяч», — кажа Васільеў.
На пытанне пра найвялікшы хабар мінулага года прадстаўнік СК адказаў, што хабар па адной са справаў, скончанай у канцы 2022 года следчымі галоўнага ўпраўлення, склаў $1 млн.
А мінімальная сума хабару была 15 рублёў. Гэты факт фігуруе ў справе пра хабарніцтва ў дачыненні да 11 службовых асоб Транспартнай інспекцыі Міністэрства транспарту і камунікацый Рэспублікі Беларусь. Абвінавачаныя, кажа Васільеў, былі гатовы прымаць любыя сумы, якія былі пры сабе ў спыненых імі кіроўцаў.
