Андрэй Уцюрын нарадзіўся ў расійскай Пензе ў сям'і былога кіраўніка вайсковай часці 3214. Вучыўся ў Саратаве, потым у Мінску. Ад пачатку лукашэнкаўскага праўлення служыў у Службе бяспекі прэзідэнта (СБП), быў кіраўніком асабістай аховы Аляксандра Лукашэнкі, а з 2007 да 2014 года — узначальваў СБП. 

Быў унесены ў санкцыйны спіс ЕС пасля выбараў 2010-га. 

З 2014-га быў пераведзены ў сакратарыят Рады бяспекі, намеснікам дзяржсакратара. Але на генеральскай пасадзе не атрымаў прамоцыі і заставаўся палкоўнікам да моманту свайго арышту ў 2019-м. 

Уцюрына затрымалі за карупцыю на дзяржзакупках: той аддаў загад міністру сувязі і кіраўніку «Белтэлекама» падпісаць кантракт з расійскім дзялком, які паабяцаў Уцюрыну траціну ад прыбытку. 

Андрэй Уцюрын у зеніце сваёй кар'еры. Скрыншот з vsr.mil.by

Андрэй Уцюрын у зеніце сваёй кар'еры. Скрыншот з vsr.mil.by

Камітэт дзяржаўнай бяспекі затрымаў яго пасля атрымання хабару 148 тысяч даляраў. Гэта здарылася ў перыяд пагаршэння адносін Беларусі з Расіяй, і некаторыя задаваліся пытаннем, ці з'яўляецца справа чыста крымінальнай, ці не ёсць яна адказам на нефармальныя кантакты Уцюрына з расійскімі дыпламатамі і разведчыкамі. Ніякімі фактамі, аднак, такую версію журналісты падмацаваць не змаглі.

Летам 2020-га былога палкоўніка судзілі, далі 12 гадоў калоніі і адабралі званне. 

Андрэй Уцюрын у клетцы на судзе. Фота: Наша Ніва

Андрэй Уцюрын у клетцы на судзе. Фота: Наша Ніва

Суразмоўцы «Нашай Нівы» ў Мінску расказалі, што яны звязваюць карупцыйную трагедыю Уцюрына з жаданнем палепшыць узровень жыцця. Асабліва на фоне таго, што многія меншыя за яго па рангу ўжо паспелі арганізаваць побыт не толькі сабе, але і дзецям. 

У выніку ў тым самым катэджы ў Драздах, на будаўніцтва якога Уцюрыну і патрэбны былі грошы, палкоўнік пажыць не паспеў. Нават не дабудаваў. І, відаць, дабудоўваць будзе ўжо не ён. 

Фота: realt.by

Фота: realt.by

З арыштаванага ў 2019-м дома і ўчастка зняты арышт, і дом з лютага гэтага года выстаўлены на продаж. 

Цана — 4,16 мільёна беларускіх рублёў, або 1,3 мільёна даляраў.

Фота: realt.by

Фота: realt.by

Уцюрын будаваў сабе дом на 590 квадратных метраў агульнай плошчы, жылой — 257. 

У доме запланаваныя пакоі адпачынку, спартовая зала, пральня, памяшканне для саўны, камора, кухня, сталовая, гасцявы пакой, гардэробная, веранда, гараж на два аўто, кацельня, два санвузлы.

Фота: realt.by

Фота: realt.by

Дом знаходзіцца на вуліцы Вербная, 24. Тое, што гэта менавіта дом Уцюрына, «Нашай Ніве» пацвердзіў таксама «Белпол»

У калоніі з Уцюрыным перасякаўся гомельскі праваабаронца Леанід Судаленка. Ён так апісваў побыт былога начальніка аховы Лукашэнкі:

«Ён не размаўляе ні з кім са зняволеных, стварыў вакол сябе вакуум. Займаецца спортам, сам вырашае, каму сказаць слова. Ён думае, што не такі як усе. І вось бывае карціна: атрад стаіць каля сталовай, а начальнік калоніі Уцюрына пакліча — і стаяць хвілін 30 размаўляюць як сябры».

«Уцюрын, сапраўды, ужо засядзеўся. І грошы яму ў «Віцьбе» не вельмі трэба. Таму самае лагічна тут — яму дазволілі прадаць дом з наступным пераводам грошай дзяржаве ў залік пагашэння віны. А там умоўна-датэрміновае і на выхад, на работу ў Расію да сяброў. Такі варыянт можа быць», — падзяліўся з «Нашай Нівай» сваім бачаннем сітуацыі былы высокапастаўлены работнік пракуратуры. 

Калі вам важна тое, што робіць «Наша Ніва», то падтрымаць нас можна праз Патрэон па спасылцы ніжэй. Тады мы зможам больш.

Клас
2
Панылы сорам
6
Ха-ха
15
Ого
2
Сумна
0
Абуральна
10