Нагадаем, згодна з дакументам, норма бяспошліннага ўвозу складзе 1 тысячу еўра і 31 кг. Раней у Беларусі дзейнічалі іншыя ліміты — 22 еўра і 10 кілаграмаў на адну пасылку. Пры гэтым колькасць бандэроляў, якія можна замовіць у месяц, не было абмежаваная.
Такім чынам, парог бяспошліннага ўвозу пасылак з-за мяжы, якія перасылаюцца ў міжнародных паштовых адпраўленнях і дастаўляюцца перавозчыкам на адрас фізічных асоб, цяпер павялічваецца да ўзроўню, які дзейнічае ва ўсіх астатніх дзяржавах — членах Еўразійскага эканамічнага саюза.
— Чым выкліканы такі атракцыён нечуванай шчодрасці?
— Гэта выклікана дакладна тым, чым і ўсе астатнія спробы лібералізацыі, у тым ліку адмена перасячэння мяжы раз у тры месяцы, бязвіз і ўсё астатняе.
Ёсць дакладнае разуменне, што з прычыны санкцый будуць вялікія праблемы з пастаўкамі рознага роду тавараў у Беларусь. Уласна кажучы, надышоў той момант, калі адбываецца лібералізацыя нехаця.
Паколькі буйныя гандлёвыя сеткі не змогуць нармальна весці свой бізнэс з-за санкцый, людзям, іпэшнікам даюць больш магчымасцяў нешта купляць. Пасылкі і ўсё астатняе — якраз такі той самы спосаб пазбегнуць дэфіцыту і даць людзям магчымасць рабіць пакупкі за мяжой.
— Гэта схаванае «зялёнае святло» чаўночнаму бізнэсу?
— Збольшага так, але я думаю, што тут больш арыентацыя ідзе на розныя пасылкі і адпраўленні з расійскіх і кітайскіх інтэрнэт-крамаў. Гэта, напэўна, прыцэл нумар адзін. А чаўнакі ўвогуле і так паедуць у Польшчу альбо польскія чаўнакі паедуць у Беларусь, паколькі ў іх бязвіз будзе. Паляк можа з Беластока паехаць у Гродна, там разгрузіцца і вярнуцца дадому.
— Норма бязмытнага ўвозу будзе дзейнічаць да 1 кастрычніка 2022 года, пасля гэтай даты яе зноў збіраюцца знізіць да 200 еўра і 31 кг.
— Думаю, што ўлады будуць глядзець на бягучую сітуацыю. Гэта ўведзена для таго, каб пазбегнуць дэфіцыту за кошт рознага дробнага бізнэсу, чаўночнага бізнэсу, паштовых даставак. Калі будзе відаць, што санкцыі працягваюць працаваць і рынак трэба насычаць такім чынам, мы ўбачым, што тэрмін дзеяння цяперашняга ліміту падоўжаць.
— Як вы лічыце, ці спрацуе гэтая мера, на тую мэту, на якую накіравана, — пазбегнуць дэфіцыту?
— Часткова спрацуе, часткова закрые патрэбы людзей. Зразумела, што гэта верне нас да перыяду 90-х і высокай інфляцыі. Альбо ты купляеш нешта вельмі дрэннай якасці за невялікія грошы, або з дэфіцытам спрабуеш урваць тое, што вырабляецца ў Беларусі ці Расіі (усё, што вырабляецца, у нас і ў РФ, гэта будзе дрэннай якасці або ў дэфіцыце). Ці ты плаціш вельмі дорага за якасны тавар, што звязана з інфляцыяй — як замежнай, у даляравай зоне, так і з тым, што лагістыка падаражэе. Адна справа везці фуры, а іншая — везці ў багажніку Passat B2, як гэта робяць чаўночнікі, і мець абменны курс, умоўна кажучы, не банкаўскі, а чорнага рынку.
Таму мы бачым сітуацыю, падобную на пачатак 90-х. Калі ты хочаш нешта добрае купіць, то гэта будзе дорага, а калі танней, але дрэннае, то за гэтым трэба будзе папаляваць, пастаяць у чарзе.
