Сваім меркаваннем наконт трагедыі ў Бучы Аляксандр Вальфовіч падзяліўся з супрацоўнікамі тэлеканала «Беларусь 1» пасля сустрэчы з актывам Смаргонскага раёна, піша Zerkalo.io.
«Тое, што адбылося ў населеным пункце Буча … Відаць, калі фэйкавая сітуацыя, калі нібыта забіты на дарозе — у люстэрка відаць — устае і сыходзіць з дарогі», — сказаў дзяржсакратар.
У сваім каментары Вальфовіч спасылаецца на рэпост, які з'явіўся ў афіцыйным тэлеграм-канале Мінабароны РФ у адказ на шматлікія фатаграфіі забітых мірных жыхароў Бучы. У пасце размяшчалася відэа нізкай якасці з такім тэкстам:
«Відэа з целамі (у Бучы) выклікае здзіўленне: тут на 12 секундзе «труп» справа рухае рукой. На 30 секундзе ў люстэрку задняга віду «труп» сядае».
Журналіст «Медыязоны» Максім Літаўрын пазней апублікаваў тое ж відэа ў добрай якасці, якое даказвае, што ніякага «варушэння рукой «на відэа не было, а труп, які ўстае» — гэта эфект скажэння ў люстэрку задняга віду.
Мінабароны Вялікабрытаніі пацвердзіла, што целы ўкраінскіх мірных жыхароў як мінімум 10 дзён праляжалі на вуліцах Бучы да таго, як расійскія войскі сышлі з горада.
Як мінімум 8 целаў былі ідэнтыфікаваныя на спадарожнікавых здымках ад 21 сакавіка.
Украіна пачала расследаванне ваенных злачынстваў у Бучы, пасля таго як яе пакінулі расійскія вайскоўцы. У горадзе было выяўлена мноства целаў загінулых мірных жыхароў, некалькі дзесяткаў з іх ляжалі проста на вуліцы.
