Праваабаронцам вядомыя імёны 334 затрыманых сёння
Колькасць затрыманых, пра якіх робіцца вядома, увесь час расце.
Затрыманні рабіліся ў Мінску і Мінскім раёне, Бабруйску, Баранавічах, Брэсце, Віцебску, Гродне, Докшыцах, Жодзіне, Кобрыне, Лідзе, Магілёве, Наваполацку, Пінску, Полацку, Светлагорску, Слуцку.
Толькі некаторыя, найбольш адметныя затрыманні:
На ўчастку для галасавання №59 (вул. Чурлёніса у Мінску) затрымалі хлопца са сцягам Украіны.
Перакладчыцу Вольгу Калацкую забралі каля школы №134.
Ірына Грыгарчук была затрыманая у 14:00 на вул. Янкі Маўра 10а. У яе быў плакат з надпісам «Нет войне».
У вёсцы Юзафова на выбарчым участку ў 11:00 затрыманы Мікалай Валуй, які быў назіральнікам.
У Баранавічах каля школы №10 затрымалі як мінімум некалькі мужчын, пенсіянерку з плакатам «Украіна, мы з вамі» і дзяўчыну. Сярод затрыманых — Віталь Цапкоў, якія стаяў удалечыні і гаварыў па тэлефоне.
У Жодзіне каля выбарчых участкаў затрымлівалі тых, хто пасля 14:00 выходзіў з участка і стаяў побач з ім.
На Савецкай плошчы дзяўчына выйшла на адзіночны пікет. Праз некалькі хвілін да яе падышлі людзі ў форме і павялі з сабой.
Каля 14:00 у Докшыцах затрымалі Таццяну Дорц. Яна выйшла на плошчу каля райвыканкама з плакатам «Слава Украіне». Праз пару хвілін пад'ехалі ДАІшнікі, затрымалі, павезлі ў РАУС.
У Магілёве каля «Беларускага дзяржуніверсітэта харчавання і хімічных тэхналогій» (былы МДУП) супрацоўнікі АМАП затрымалі і павезлі ў невядомым кірунку пажылую жанчыну. Таксама сілавікі адагналі ад будынка ўніверсітэта, дзе размяшчаецца ўчастак для галасавання, пару з дзецьмі.
У Лідзе затрымалі жанчыну з антываенным плакатам. Затрыманне адбылося ў мясцовым ліцэі.
Ганна Даі ў Наваполацку затрыманая за тое, што сябры выбарчай камісіі ўбачылі, як яна сфатаграфавала бюлетэнь.
У Мінску затрымалі жанчыну з сабакам. За што менавіта — пакуль невядома.
У Брэсце днём затрымалі мужчыну, які сказаў амапаўцу, што ён супраць вайны. Прыблізна 60 чалавек сабраліся каля выбарчага ўчастка, да іх падышоў амапавец і запатрабаваў ад людзей разысціся. У адказ мужчына сказаў яму: «Я пратэстую супраць вайны». Пасля гэтага яго затрымалі.
У Кобрыне каля 30 чалавек выйшлі на антываенную акцыю ў 17.00. Людзі сабраліся ў цэнтры горада. Сілавікі паспрабавалі затрымаць двух чалавек, адзін уцёк, другога затрымалі.
Афіцыйная інфармацыя:
Следчым камітэтам узбуджаныя крымінальныя справы за грубае парушэнне грамадскага парадку, супраціў міліцыі і заклікі да такіх дзеянняў:
«Цяпер затрыманыя больш за 10 арганізатараў, якія заклікалі да экстрэмісцкіх дзеянняў. З падазраванымі працуюць следчыя. Іх дзеянням дадзена прававая ацэнка», — піша ведамства.
«Не вайне!»
Да 17.00 Святлана Ціханоўская заклікала выходзіць да будынка Генштаба пратэставаць супраць вайны Расіі з Украінай і ўдзелу ў гэтым Беларусі на баку Расіі.
Таксама людзі прайшлі калонай каля Dana Moll каля станцыі метро «Усход».
У цэнтры Мінска шмат людзей.
Людзі гуляюць, часам невялікія групы скандуюць антываенныя і праўкраінскія лозунгі. Машыны сігналяць.
У адказ на інфармацыю пра збор беларусаў сілавікі перакрылі цэнтр Мінска, а метрапалітэн закрыў станцыі у раёне Генштаба.
Нягледзячы на велізарны ціск і санкцыі, простыя беларусы не баяцца выказваць сваё меркаванне супраць беларускіх улад і ў падтрымку Украіны!
У Беларусі, аднак, гэта справа небяспечная, ідуць затрыманні.
Пратэснае галасаванне на ўчастках
Да 14.00 на ўчасткі заклікала дэманстратыўна прыходзіць Святлана Ціханоўская, многія на яе заклік адгукнуліся.
А вось так выглядалі сёння бюлетэні тых, хто прыйшоў на ўчасткі выказацца супраць вайны
Фоты чытачоў «Нашай Нівы»
