Прыбыццё ў Мінск пасла ЗША ў Беларусі чакаецца летам гэтага года, паведаміла журналістам часовы павераны ў справах ЗША Джэніфер Мур, перадае БелТА.
Дыпламат узяла ўдзел у памятнай цырымоніі на месцы пахавання аднаго з удзельнікаў знакамітай сустрэчы на Эльбе Аляксандра Сільвашкі. Фота, дзе ён паціскае руку амерыканскаму лейтэнанту Уільяму Робертсану, стала хрэстаматыйным, пазначыўшы сабою сустрэчу саюзнікаў па антыгітлераўскай кааліцыі.
Як паведамлялася, Беларусь і ЗША сёлета заяўлялі пра намер абмяняцца пасламі. Дональд Трамп вылучыў на пасаду пасла ў Беларусі намесніка памочніка дзяржсакратара ў справах Заходняй Еўропы і ЕС Джулі Фішэр. Яна можа стаць першым паслом ЗША ў Беларусі ад 2008 года. Да гэтага яна з'яўлялася намеснікам сталага прадстаўніка ЗША пры НАТА, часовым павераным у справах ЗША ў Расіі, працавала ў амерыканскіх пасольствах у Грузіі і Украіне.
