Увечары 7 студзеня ў слуцкую міліцыю паступіў званок: мясцовы жыхар пагражаў, што скончыць жыццё самагубствам.
Адбывалася ўсё у двары прыватнага дома ў вёсцы Малое Журава. Калі прыехала міліцыя, мужчына ўжо здзейсніў стрэл сабе ў галаву з траўматычнага пісталета, але быў жывы, паведамляе «Слуцк Горад».
Двухгадзінныя ўгаворы міліцыі і сваякоў не дапамаглі, і мужчына стрэліў сабе ў галаву ў другі раз. Ён стаў смяротным.
Мужчыну звалі Юрый Крывадубскі. Яму было 55 гадоў.
«Наша Ніва» пагаварыла з мамай Юрыя.
«6 студзеня ён быў дома, усё было нармальна… Але ўвечары без дай прычыны пачаў бегаць па хаце, глядзеў ў вокны. Пасля апрануўся абы-як, кудысьці сышоў, — распавяла жанчына. —
Дзе ён быў, я не ведаю. Але ўдзень вярнуўся. Зайшоў у хату, забраў той пісталет, выйшаў на двор. Стрэліў у сябе. Я хацела падысці, забраць пісталет — ён не даўся. Перабег у двор да суседзяў. Там ужо прыехала міліцыя, сваякі пазбягаліся, усе ўгаворвалі яго.
А ён прыставіў пісталет да галавы, хадзіў, крычаў «Вы ўсе здраднікі!», «Вы хочаце, каб я хутчэй таго, дык я сам і зраблю ўсё», — нешта такое крычаў.
А пасля і стрэліў у сябе другі раз. Паваліўся. Быў спачатку жывы яшчэ. Адвезлі ў бальніцу, але ён сканаў у рэанімацыі».
Мама Юрыя запэўнівае, што сын не быў п’яны. Па яе словах, алкаголь ён увогуле не ўжываў. Ці здарыўся ў сына нейкі канфлікт са сваякамі, ці, можа, жанчынай, маці таксама не ў курсе.
«Проста нібыта дурнота нейкая ў галаву зайшла — і ўсё», — наракае яна.
