За мінулыя суткі ў лясах Віцебскай вобласці шукалі 16 чалавек, паведаміла БЕЛТА афіцыйны прадстаўнік Віцебскага абласнога ўпраўлення МНС Марына Фандо.
Грыбнікоў шукалі ў лясах васьмі раёнаў. Ратавальнікі выязджалі на пошукі ў Бешанковіцкім, Віцебскім, Глыбоцкім, Гарадоцкім, Дубровенскім, Аршанскім, Шумілінскім і Талачынскім раёнах. Жыхару Віцебска, што заблукаў каля вёскі Белянкова Шумілінскага раёна, прыйшлося правесці ноч у лесе, раніцай ён выйшаў самастойна. Астатніх грыбнікоў знайшлі яшчэ да змяркання, яны выходзілі на гук сірэны пажарнай машыны.
«Многія грыбнікі, зразумеўшы, што заблукалі, прымаюць правільнае рашэнне адразу звярнуцца па дапамогу ў экстранную службу. Вывесці іх з лесу ў такіх выпадках атрымліваецца звычайна да цемры», — адзначыла Марына Фандо. Аматарам ціхага палявання яна нагадала пра неабходнасць мець з сабой зараджаны мабільны тэлефон і яркія элементы адзення.
