Трынаццаць гадоў таму ў гэты дзень — 22 чэрвеня, пайшоў з жыцця Вялікі беларускі пісьменнік Васіль Быкаў.
Чалавек, якога называлі Сумленнем нацыі.
Васіль тады толькі вярнуўся з эміграцыі, каб за год да 80-годдзя памерці на роднай зямлі — ён пакутаваў на анкалогію.
Да ўгодкаў смерці Васіля Быкава «Наша Ніва» публікуе фільм рэжысёра Віктара Дашука «Васіль Быкаў. Настальгія».
Аўтар аналізуе апошнія гады Быкава. Прычыны, чаму гэты прарок беларускага народа аказаўся ў выгнанні.
Віктар Дашук. Фота Сяргея Гудзіліна
У стужцы ёсць эксклюзіўныя разважанні самога Быкава, якія раней не друкаваліся для шырокай публікі.
Так, Васіль Быкаў расказвае, што змусіла яго з'ехаць з Беларусі ў Еўропу.
«Вельмі дыскамфортна жыць, калі на цябе коса глядзяць не толькі ў вялікім палацы, але і твае суседзі, — кажа Васіль Быкаў у фільме. — Накшталт таго, калі я іду па двары свайго дома, дык чую, што пенсіянеры, што там сядзяць, кідаюць мне даволі зняважлівыя выказванні: «Вось пайшоў беларускі пісьменнік, такую яго маць». Гэта, канешне, уражвае. Ну, на нейкі момант. Вось гэта кепска. І тут хочацца адгэтуль пайсці некуды ў бок, каб не чуць гэтага. І я знайшоў прытулак у былой фашыстоўскай Нямеччыне, і ад тых людзей, якія некалі былі маімі ворагамі, я такога не чую».
Глядзіце фільм цалкам.
