Танк Корпуса марской пяхоты ЗША падчас вучэнняў.
Міністэрства абароны ЗША правяло гэтым летам некалькі сакрэтных вучэнняў, мэтай якіх была ацэнка здольнасці Амерыкі весці вялікую вайну ў выпадку адкрытага канфлікта з Расіяй, піша thedailybeast.com.
Многія амерыканскія вайскоўцы лічаць, што пасля 15-гадовай канцэнтрацыі Пентагона на вайне супраць тэрарыстаў і паўстанцаў ягоныя наземныя войскі дрэнна падрыхтаваныя для маштабных ваенных дзеянняў у тым выпадку, калі Масква нападзе на аднаго з сябраў НАТА.
Праблемы паўстаюць і ў сферы лагістыкі, якая будзе патрабаваць масавага і далёкага перакідвання войскаў, гэтак і ў недастатковых запасах кіраваных боепрыпасаў.
«Ці можам мы сёння пабіць расейцаў? Так, але гэта будзе патрабаваць усіх нашых сіл. Мы не настолькі гатовыя, як мы хочам быць», — сказаў адзін з прадстаўнікоў Мінабароны ЗША.
«Войны [у Іраку і ў Афганістане] знізілі нашу здольнасць доўгі час весці баявыя дзеянні», — сказаў іншы чыноўнік, спасылаючыся на вынікі сакрэтных выпрабаванняў, якія праводзіліся Пентагонам пры ўдзеле некалькіх іншых федэральных органаў.
«Супраць такога ворага як Расія, нельга спадзявацца на тую татальную перавагу ў паветры, якую мы мелі ў канфліктах пасля 11 верасня [2001 года]. Любы канфлікт вялікага маштабу з такім праціўнікам будзе патрабаваць нашых людзей і рэсурсаў з іншых частак свету, дзе цяпер яны дзейнічаюць так актыўна, што ў іх няма часу на падрыхтоўку да вайны іншага тыпу», — дадаў ён.
Аналітыкі блізкія да адміністрацыі прэзідэнта Барака Абамы і Дэмакратычнай партыі лічаць, што Пентагон такім чынам проста спрабуе атрымаць большы бюджэт.
«Раней такім жа чынам флот казаў пра пагрозу з боку Кітая», — кажа супрацоўнік вашынгтонскага Center for American Progress Лоўрэнс Корб.
