Амерыканская інвестыцыйная кампанія Goldman Sachs лічыць, што ў наступным месяцы Украіна не зможа ажыццявіць плацёж па крэдыце і абвесціць дэфолт.
Пра гэта паведамляе агенцтва Bloomberg са спасылкай на справаздачу кампаніі.
Аналітык кампаніі Эндру Матэні напісаў у сераду, што наўрад ці ўрад зможа дамовіцца з крэдыторамі па плане рэструктурызацыі на наступным тыдні і, верагодна, абвесціць мараторый яшчэ да 24 ліпеня — даты, на якую прызначаная выплата па купоне.
«Украіна не ажыццявіць выплату, прызначаную на 24 ліпеня, і ў выніку ўвойдзе ў стан дэфолту» - паведаміў ён, дадаўшы, што крэдыторы, хутчэй за ўсё, не прымуць прапанаваны план рэструктурызацыі доўгу.
Выданне нагадвае, што Украіна прасіла спісаць 40% агульнага доўгу і купіць яе новыя аблігацыі пад забеспячэнне будучай эканамічнай дзейнасці.
