Re1ikt і «Голая манашка» сыграюць у лютаўскім «Жывым Тузіне»

Героі беларускага панк-року, гурт «Голая манашка» прэзэнтуе 24 лютага ў Loft cafe сваю новую праграму «Nota Bene» пры падтрымцы піянэраў беларускамоўнага пост-мэталу Re1ikt.

Федзя Жывалеўскі — жывы-здаровы, знаходзіцца ў ясным розуме і па-ранейшаму можа прапанаваць арыгінальны і непаўторны творчы прадукт. Пра гэта сьведчыць праграма «Nota Bene», якую гурт «Голая манашка» зьбіраецца прэзэнтаваць у межах «Жывога Тузіна». У яе ўвайшлі песьні, якія былі напісаныя ў апошні год. Загалоўны трэк «Харошы знак» быў летась прэзэнтаваны на Tuzin.fm ад імя сайд-праекту Федзі «Вясёлая манашка».

Акром аўтарскіх рэчаў у праграму ўключаныя аўтарскія пераклады лідэра «Голай манашкі» песень, што выконвалі Курт Кабэйн і Ягор Летаў — «Дзяўчынка» і «Куля-дура». Музыкі выйдуць на сцэну Loft cafe поўным складам і дадуць паўнавартасны канцэрт. «Трэшу ня будзе, будзе фрэш! — кажа Федзя, — „Nota Bene“ — гэта песьні пра жыцьцё і каханьне, у якіх распавядаецца пра адзін з варыянтаў творчага шляху. Ёсьць меркаваньне, што праз каханьне зямное, міласэрнасьць і праведнасьць можна спазнаць каханьне да Бога. Проста зьвярнiце ўвагу на тое, як гэта можа выглядаць». Песьні, што ўвайшлі ў праграму «Nota Bene» існуюць у выглядзе дэма-запісаў, у найбліжэйшы час музыкі зьбіраюцца іх дарабіць і выдаць паўнавартасны альбом.

Падтрымае «Голую манашку» гурт Re1ikt, які таксама рыхтуе да гэтага вечару асаблівую праграму, куды ўвойдуць зусім новыя, добравядомыя і забытыя рэчы ў сьвежых, часам нечаканых аранжыроўках.

Весьці канцэрт «Жывы Тузін» па традыцыі будзе Алег Хаменка, музыкант і нязьменны вядучы радыёвэрсіі гіт-параду «Тузін Гітоў». Не абыйдзецца справа без падарункаў ад сяброў «Тузіна Гітоў» — кампаніі «Будзьма беларусамі».