Dakumienty NKVD abviarhajuć Łukašenku 11

Padčas pres-kanfierencyi ŚMI 23 śniežnia Alaksandr Łukašenka, adkazvajučy na pytańnie pra biełaruski katynski śpis, zajaviŭ, što «nivodnaha palaka na terytoryi Biełarusi źniščana nie było». «U nas akazalisia tolki pierasylnyja punkty», — kazaŭ kiraŭnik dziaržavy.

Hetyja słovy abviarhajuć źviestki pra «biełaruski katynski śpis» z 3870 asobaŭ, jaki Polšča prosić joj pieradać.

Pavodle zapiski staršyni KDB SSSR Šalepina Chruščovu, datavanaj 1956 h., u turmach Zachodnich Ukrainy i Biełarusi ŭ vykanańnie «apieracyi, sankcyjanavanaj rašeńniem Palitbiuro CK VKP(b) ad 5 sakavika 1940», było rasstralana 7305 polskich vajennapałonych i cyvilnych. Va ŭkrainskim «katynskim śpisie», niadaŭna pieradadzienym Polščy, — 3435 proźviščaŭ.

Značyć, rešta — rasstralanyja ŭ Biełarusi.

U listapadzie 2010 h., padčas intervju polskim žurnalistam, Łukašenka paabiacaŭ asabista zaniacca spravaj «katynskaha śpisu» i zrabiŭ ahavorku, što «mnohija dakumienty byli vyviezienyja ŭ Maskvu». Dziŭna ciapier čuć, što dakumienty pra rasstreł nie znajšlisia, kaža historyk Ihar Kuźniacoŭ.

Uskosnyja śviedčańni pra źniščeńnie palakaŭ jość navat u adkrytym dostupie. I zhadanaje rašeńnie Palitbiuro, i dyrektyva Bieryi Kahanoviču — pradastavić 155 vahonaŭ dla etapavańnia ŭ Minsk «polskich źniavolenych», datavanaja 21 sakavika 1940-ha. I zahad Bieryi «Pra razhruzku turmaŭ NKVD USSR i BSSR», dzie paznačana, što z Baranavickaj, Vilejskaj, Bresckaj i Pinskaj turmaŭ u Minsk musili etapavać 3000 źniavolenych. Kudy ich «razhruzili» ź minskaj turmy?

Kurapaty, Łošyca, Traktarny zavod, Błahoŭščyna, Aeraport-1, Kamaroŭka, Park Čaluskincaŭ, Masiukoŭščyna — i heta jašče nie ŭsie miescy pachavańnia achviar NKVD,

kaža I.Kuźniacoŭ. U kožnym ź ich mohuć lažać achviary «polskaj» apieracyi krasavika-maja 1940 hoda.

Ale, na jaho dumku, najvierahodniej — u Traściancy. «Viaźniaŭ hruzili ŭ vahony na stancyi Minsk-Tavarny i vieźli ŭ Šabany.

Tak možna niezaŭvažna pieramiaścić vialikuju kolkaść ludziej u polskaj formie». Darečy, na tym samym miescy paźniej buduć źniščać ludziej nacysty. Ciapier na miescy traścianieckich pachavańniaŭ — hihancki śmietnik…

Ci moža być, kab dakumienty pra rasstreły nie zachavalisia? Usie śpisy, kaža Kuźniacoŭ, dublavalisia minimum u 2-ch asobnikach. Kali Słužba biaśpieki Ukrainy pieradała Polščy «ŭkrainski katynski śpis», čamu biełaruski prapaŭ? Było ž adzinaje NKVD ź identyčnaj dakumientacyjaj.

A navat biez uliku rasstralanych u 1940-m, zhodna z pastanovaj Palitbiuro, kazać pra toje, što ŭ Biełarusi nie źniščali palakaŭ, — niapraŭda, ličyć Kuźniacoŭ. Byli rasstreły viaźniaŭ turmaŭ u Zachodniaj Biełarusi pierad prychodam hitleraŭcaŭ. Tak, u Hłybokim enkavedysty zabili bolš za 700 čałaviek. Častka ich, kazali vidavočcy, była ŭ polskaj vajskovaj formie.

«Navat pavodle aficyjnych źviestak, 22% ad ahulnaj kolkaści represavanych u Biełarusi — palaki», — padsumavaŭ I.Kuźniacoŭ.

Darečy, siarod zabitych pa «Katynskim śpisie» byli nie tolki palaki. Byli tam i biełarusy, i ŭkraincy, jakija słužyli ŭ Vojsku Polskim ci naležali da zachodniebiełaruskich elitaŭ. Saviety dziejničali anałahična nacystam: jany chacieli abiezhałović zavajavanyja nacyi.

Siarhiej Mikulevič

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH