Ramana Pratasieviča (u centry) viaduć ahienty ŭ cyvilnym. Fota euroradio.fm.
U razmovie z žurnalistam «NN» žančyna skazała, što častkova infarmacyja, jakaja źjaviłasia ŭ internecie apošnimi dniami, niepraŭdzivaja. Pa jaje słovach, Ramana nie adličyli ź Liceja BNTU i jana nie sprabavała zaciahnuć padletka na sieans ekzarcyzmu, kab «vyhnać djabłaŭ».A teksty, jakija Raman ahučvaje ŭ videazvarotach, ličyć zahadzia kimści padrychtavanymi.
Natalla Pratasievič adznačyła, što kanflikt z synam uźnik pierad maŭklivaj akcyjaj 21 vieraśnia. Ranicaj jana z mužam adhavorvała syna iści na jaje. Pa jaje słovach, sprava navat nie ŭ tym, što jana za kahości albo suprać. A ŭ tym, što Raman jašče niepaŭnaletni, dy i ŭsie viedajuć, jak ludzi pry razhonach takich akcyj cierpiać. Ale Raman skazaŭ, što ŭ lubym vypadku pojdzie.
«Tut palityka ni pry čym»,
— skazała Natalla. Ale adznačyła, što spačatku Raman pavinien atrymać adukacyju. A paśla ŭžo sam zrobić svoj vybar. «Usio pavinna być zakonna. Dzieci nie pavinna zajmacca palitykaj. Hetym pavinny zajmacca darosłyja».
Pa słovach žančyny, dakumienty syna ź Liceja BNTU baćki zabrali sami. U jaho było papiaredžańnie za zatrymańnie padčas padobnaj akcyi ŭ lipieni. Paśla taho jak junak pačaŭ ahitavać inšych navučencaŭ dałučycca da mierapryjemstva ŭ sieradu, dyrektaraka navučalnaj ustanovy vyklikała baćkoŭ. Kali tyja zrazumieli, što nie mohuć paŭpłyvać na syna, zabrali dakumienty ź liceja. Natalla zaŭvažyła, što dyrektarka navat nie napisała admoŭnaj charaktarystyki.
Sa škoły, u jakuju pieravioŭsia Raman, baćki taksama zabrali dakumienty. Bo jany, jak vyjaviłasia, byli nie da kanca aformleny. Ale dyrektar škoły hatovy pryniać junaka nazad, jak tolki ŭsie pytańni vyrašacca.
Natalla Pratasievič abvierhła infarmacyju, što syn ciapier moža trapić u sacyjalny prytułak.
Pra takuju vierahodnaść siońnia zajaviŭ Raman u čarhovym videazvarocie. I zaklikaje Ramana viarnucca dadomu, dzie toj nie źjaŭlajecca čaćviora sutak. Jana kaža, što hatovaja adpravić syna vučycca ŭ VNU ŭ Polšču, kali toj tak choča. Ale padkreślivaje, što tolki zakonnym sposabam i paśla atrymańnia atestata ab siaredniaj adukacyi.
Ciapier situacyjaj z Ramanam, jak adznačyła jaho maci, zajmajecca inśpiekcyja pa spravach niepaŭnaletnich.
Natalla taksama aburana tym brudam, jaki vylivajecca na internet-forumach na jaje siamju. Jana adznačyła, što ŭsie abrazy zafiksavany i imi buduć zajmacca pravaachoŭnyja orhany.
Historyja z Ramanam Pratasievičam razharełasia ŭ kancy minułaha tydnia. 16-hadovy junak zajaviŭ, što syšoŭ z domu praź idejny kanflikt z baćkami. A pierad hetym byŭ adličany ź Liceja BNTU za ŭdzieł u maŭklivaj akcyi pratestu.
