Siabra žury Artur Vakaraŭ uručaje pryz Premii Michała Aniempadystava — «Bronzavy Anioł» — Janie Hałuškinaj. Fota: Reform.news.
Biełaruskaja dyzajnierka Jana Hałuškina stała pieramožcaj premii Michała Aniempadystava za vokładku da knihi «Ludzi Lesu / Ludzi Lesu», vydadzienaj u 2022 hodzie niezaležnym fotaarchivam VEHA. Žury acaniła vyvieranuju i łakaničnuju kampazicyju, pabudavanuju na estetycy minimalizmu, praź jakuju dasiahajecca jadnańnie historyi i sučasnaści. Cyrymonija ŭznaharodžańnia prajšła ŭ Varšavie ŭ aŭtorak, piša Reform.news.
Hetaksama vokładka, stvoranaja Janaj Hałuškinaj, atrymała śpiecyjalnuju adznaku telekanała «Biełsat», partniora premii.
Inicyjatyva VEHA, vydaviec vyłučanaj knihi «Ludzi Lesu / Ludzi Lesu», źbiraje i katałahizuje ličbavyja kopii fotazdymkaŭ ź siamiejnych archivaŭ, što tyčacca roznych aśpiektaŭ hramadskaha žyćcia ad momantu źjaŭleńnia fatahrafii i da 1980-ch hadoŭ.
Archiŭ źbirajecca vakoł roznych temaŭ, «Ludzi Lesu» — heta čaćviortaja tema i čaćviortaja kniha archiva. U joj sabranyja staryja fotazdymki ludziej u prastory lesu. «Tema harmaničnaha suisnavańnia čałavieka i pryrody, adlustravanaja ŭ mnostvie siamiejnych archivaŭ, heta važnaja častka našaj vizualnaj historyi», — apisvaje vydańnie anatacyja.
Jana Hałuškina vyrašała vielmi składanyja zadačy ŭ prezientacyi archiva i dasiahnuła pośpiechu ŭ tonkim bałansie pamiž ličbavaj prastoraj (archiŭ VEHA — ličbavy) i prastoraj našaj pamiaci, jakuju reprezientujuć archiŭnyja zdymki.
U fatahrafičnuju vyjavu aŭtarka vokładki ŭviała płoskasny abstrahavany malunak — hety chod taksama byŭ adznačany žury konkursu. Sučasny šryft, koleravaja hama, jakaja adsyłaje i da vobrazu lesu, i da abstraktnaj ličbavaj prastory, i adnačasova, pavodle mierkavańnia pradstaŭnikoŭ archiva VEHA, da koleraŭ školnaha sšytka, — źjaŭlajucca tonka pradumanymi elemientami dyzajnu.
Tłumačeńni, jakija daŭ archiŭ VEHA pra vokładku svajoj knihi, adroźnivajucca ad interpretacyi členaŭ žury, ale tym bolš cikava daviedacca pra supadzieńnie dyzajnierskaha rašeńnia i čakańniaŭ zamoŭcy knihi:
«Vokładka składajecca ź dźviuch častak. Supiervokładki, padobnaj da staroha školnaha sšytka, jaki prynosić uspaminy ab paŭsiadzionnym minułym, jaki abjadnoŭvaje roznyja pakaleńni. Asnoŭnaja vokładka — heta druk na kardonie fatahrafii z kalekcyi. Heta vyjava žančyny, jakaja źnikaje ŭ kancy knihi. Kambinacyja hetych dvuch pramych anałohij, praz koler, ź liściem i karoj dreva, pahružaje nas u temu kalekcyi «Ludzi Lesu».
Śpiecyfika konkursu hetaha hoda zaklučałasia ŭ nievialikaj kolkaści prac, prapanavanych dla razhladu. Dazvalaŭsia ananimny ŭdzieł u premii. «Namahajučysia zachavać adzinstva našaj litaraturnaj, mastackaj supolnaści, namahajučysia nie pieraŭtvarycca ŭ emihrancki kłub, my vymušanyja iści nasustrač ludziam, jakija znachodziacca ŭ Biełarusi», — prakamientavała rašeńnie Taćciana Niadbaj. Tak, u publičnaj prastory byli ahučany nie ŭsie imiony aŭtaraŭ vaśmi vokładak-finalistaŭ.
Minułym hodam konkurs nie pravodziŭsia, daviałosia pieraadolvać kryzis emihracyi, ale Biełaruski PEN «pierahrupiravaŭsia» i abiacaje dapracavać u tym liku finansavuju častku konkursu. Ciapier uznaharodaj premii źjaŭlajecca bronzavy anioł, i heta adzinaja premija PENa, jakaja maje taki pryhožy artefakt.
Premija za najlepšuju knižnuju vokładku zasnavanaja ŭ 2019 hodzie ŭ pamiać pra mastaka, dyzajniera i paeta Michała Aniempadystava.
Uznaharoda prysudžajecca biełaruskamu aŭtaru abo kamandzie aŭtaraŭ vokładki. Žury aceńvaje dyzajn, palihrafičnaje vykanańnie i adpaviednaść afarmleńnia źmiestu knihi.
Papiaredni raz premija ŭručałasia ŭ 2022 hodzie, pieramožcam staŭ Anatol Łazar za vokładku da knihi «NIErasstralanyja».
