Prahrama vučyć karystalnikaŭ skaračać asabisty vuhlarodny śled. Za navuku, projdzienuju ŭ prahramie, kamanda startapa sadzić realnyja drevy. A CO2 kalkulatar unutry prahramy padličvaje vaš uniosak u dapamohu płaniecie. Alaksiej raskazaŭ dev.by detali.
— Hłabalnaje paciapleńnie — surjoznaja prablema. Pavodle acenak Bloomberg, kab spynić hłabalnaje paciapleńnie, treba vydatkavać kala 50 tryljonaŭ dołaraŭ.
I kali my najbližejšymi dziesiacihodździami nie vyrašym hetaj prablemy, to, pavodle acenak Forbes, u 2100 hodzie ad nastupstvaŭ hłabalnaha paciapleńnia zahinie bolš jak 83 miljony čałaviek, bolš čym u časie Druhoj suśvietnaj vajny.
Ale dla zvyčajnych ludziej siońnia niama jakasnych praduktaŭ, jakija dazvalali b efiektyŭna ŭpłyvać na vyrašeńnie hetaj prablemy.
Nam prapanoŭvajuć, naprykład, prytrymlivacca Responsible Consumption (ekanomnaje vykarystańnie pryrodnych resursaŭ u ramkach zadavalnieńnia tolki nieabchodnych patreb). Ale navat kali my štości robim, kab minimizavać admoŭnaje ŭździejańnie na navakolnaje asiarodździe, to nie možam acanić efiekt ad svaich dziejańniaŭ. I ŭrešcie nie možam całkam vyklučyć niehatyŭny ŭpłyŭ na navakolnaje asiarodździe.
Tamu i źjaviłasia ideja stvaryć cikavy, zrazumieły i prazrysty pradukt dla karystalnika. Kab jon razumieŭ svoj uniosak u vyrašeńnie prablem navakolnaha asiarodździa.
Adzin sa sposabaŭ kampiensavać škodu, jakuju čałaviek nanosić płaniecie — heta pasadzić dreva. Drevy i hleba na dadzieny momant adkaznyja za 99,9% vymańnia CO2 z atmaśfiery. Pry hetym u śviecie vysiakajecca prykładna 15 miljardaŭ dreŭ štohod, a vysadžvajecca tolki pałova ad taho, što było vysiečana.
My dla siabie vyznačyli hłabalnuju metu — pryjści da taho, kab štohod u śviecie vysadžvałasia stolki ž dreŭ, kolki vysiakajecca. To-bok kali ciapier vysadžvajecca 7-8 miljardaŭ, značyć nieabchodna dadać jašče prykładna stolki ž.
Meta vielmi ambicyjnaja. Naprykład, Eden Reforestation Projects — najbujniejšaja non-profit arhanizacyja, jakaja vysadžvaje drevy, za apošnija 10 hadoŭ pasadziła prykładna miljard dreŭ. A my havorym pra 8 miljardaŭ dreŭ na hod.
My nie adrazu pryjšli da kancepcyi prahramy.
Pačali z arhanizacyi iventaŭ pa pasadcy dreŭ. Za viasnu-vosień minułaha hoda praviali 24 iventy ŭ roznych krainach, naprykład, u Litvie, Polščy, Čechii, Hiermanii, Niderłandach, ZŠA, Francyi. Pasadzili kala tysiačy sadžancaŭ. Zakazvali ich na eBay i Allegro prykładna pa dołary za štuku. Heta standartnaja cana na sadžancy i ŭ Polščy, i ŭ ZŠA, i ŭ inšych krainach pry zamovie nievialikich partyj pa 50-70 štuk.
Ale ŭžo ŭ pracesie my zrazumieli, što pastajannaja arhanizacyja takich iventaŭ patrabuje vialikich finansavych układańniaŭ i času. Spadarožnyja vydatki vyjavilisia ŭ razy vyšejšymi za vydatki na zakupku sadžancaŭ.
Kali na sadžancy my vydatkavali 1000-1500 dołaraŭ, to na arhanizacyju iventaŭ nie mienš za 15 000 dołaraŭ z ulikam vydatkaŭ na transpart, charčavańnie, zabaŭlalnyja prahramy.
Ale i žycharam haradoŭ, jak pakazaŭ vopyt, całkam samim arhanizavać dosyć składana. Z usich iventaŭ faktyčna biez našaha biespasiaredniaha ŭdziełu byli arhanizavanyja tolki čatyry. Tamu my źmianili kancepcyju i vyrašyli praciahnuć realizacyju svajho prajekta praz prahramu.
Jak pracuje PineOx
Prahrama PineOx ciapier pracuje ŭ beta-režymie, ale kožny achvotny, chto maje iPhone, moža ŭstalavać jaje, prateściravać i pasadzić svajo dreva. Dla hetaha treba spampavać prahramu z AppStore i skarystacca dla rehistracyi invajt-kodam «YM1OS5». Viersija dla Android maje źjavicca najbližejšymi dvuma miesiacami.
U prahramie karystalniku treba adkazać na šerah pytańniaŭ, jakija tyčacca jaho paŭsiadzionnaha žyćcia, naprykład, jak časta jon lotaje na samalocie, jak časta jeździć na aŭtamabili, u jakim domie žyvie (enierhaefiektyŭnym ci nie).
Na asnovie atrymanych danych śpiecyjalny kalkulatar raźličvaje emisiju CO2 kankretnaha karystalnika (acenka ŭzroŭniu vykidu parnikovych hazaŭ), a taksama raźličvaje, na jaki čas karystalnik stanie CO2-niejtralnym paśla pasadki adnaho dreva.
Taksama paśla rehistracyi novy karystalnik atrymlivaje virtualnuju siemiečku, jana biaspłatnaja. Paliŭšy siemiečku, karystalnik atrymlivaje mahčymaść pasadzić realnaje dreva z dapamohaj kamandy PineOx. Kab palić siemiečku, treba prajści dva kvizy.
U hety momant budzie załočanaja nastupnaja virtualnaja siemiečka. Kab jaje adkryć, možna zaprasić siabra, padaryć dreva siabru abo pahladzieć rekłamu.
Karystalnik maje mahčymaść padaryć kamu-niebudź dva drevy. Dla hetaha treba vybrać kantakt z zapisnoj knižki i pakinuć paviedamleńnie hetamu čałavieku. Jamu pryjdzie esemeska sa spasyłkaj na sajt i paviedamleńniem, što taki i taki čałaviek padaryŭ dreva. To-bok pry rehistracyi ŭ druhoha karystalnika ŭžo budzie svajo dreva.
Taksama ŭ PineOx jość funkcyja tree impact — heta kolkaść dreŭ, pasadžanych karystalnikam i tymi, kaho jon zaprasiŭ. Tree impact karystalnika adlustroŭvajecca ŭ vyhladzie ŭźleśsia, dzie kožnaje dreva źjaŭlajecca realna pasadžanym.
Inviestycyi, manietyzacyja, seed raŭnd
— U kamandzie PineOx ciapier kala 15 čałaviek. My sami całkam kantralujem uvieś praces — ad zakupki sadžancaŭ da ich pasadki, bo inšyja arhanizacyi nie zmohuć zabiaśpiečyć nieabchodny ŭzrovień prazrystaści.
Śpiecyjalnych navykaŭ, kab navučycca sadzić drevy, nie treba. Praces prosty, za 5-10 chvilin možna rastłumačyć i pakazać, jak heta robicca. Prafiesijnyja tree-planters za dzień mohuć pasadzić da 3 tysiač dreŭ.
Sadžancy zakuplajem na Allegro prykładna pa dołary za štuku. Kab prajekt raźvivaŭsia, sadžancy majuć być, pa-pieršaje, tannymi, pa-druhoje, kab za imi patrabavaŭsia minimalny dohlad, inakš heta mocna pavialičyć vydatki. Mienavita tamu my spynilisia na chvojach i jełkach, u jakich plus da ŭsiaho vielmi šyroki areał raśsialeńnia.
Dumaju, ciapier budziem šmat dreŭ sadzić u Polščy. My ŭžo majem vopyt, šmat iventaŭ pa pasadcy dreŭ letaś jakraz praviali ŭ hetaj krainie.
Darečy, padčas siezona pasadki laśnictvy i ŭ Polščy, i ŭ Biełarusi vydajuć sadžancy biaspłatna, kali jość achvotnyja ich pasadzić. I nie tak daŭno my zmahli takim čynam pasadzić u Biełarusi 1200 sadžancaŭ.
Usie pasadžanyja drevy abaviazkova fatahrafujem. Karystalnik atrymlivaje dostup da fatahrafii svajho dreva i infarmacyju pra łakacyju, dzie jano raście. Taksama ŭ prahramie jość mahčymaść pahladzieć, kolki dreŭ i dzie pasadzili inšyja karystalniki.
To-bok my trymajemsia maksimalnaj prazrystaści. U mnohich non-profit kampanij, jakija zajmajucca vysadkaj dreŭ, jość prablemy z prazrystaściu. U ich spravazdačach nie zaŭsiody jość usia nieabchodnaja infarmacyja, u tym liku pra vykarystańnie hrošaj hramadzian, jakija danacili takim kampanijam.
Prajekt ja całkam sam finansuju. Ahulnyja vydatki na siońnia pieravyšajuć 100 tysiač dołaraŭ. U PineOx układzienyja hrošy, jakija ja atrymaŭ ad prodažu svajoj doli ŭ inšym prajekcie Sleepagotchi (prahrama, jakaja dapamahaje vykonvać režymu snu).
Pakul prahrama PineOx nijak nie manietyzujecca. Hety funkcyjanał źjavicca krychu paźniej. Ciapier u nas u płanach zapuścić markietynhavuju kampaniju jakraz ź viasnovym siezonam pasadki dreŭ. A dalej płanujem pryciahnuć seed-raŭnd, jak tolki budzie trekšan i mahčymaść prademanstravać inviestaram niejkija ličby.
