Siońnia Alaksandr Łukašenka narešcie pryznačyŭ ministra pryrodnych resursaŭ i achovy navakolnaha asiarodździa. Heta pasada była vakantnaj ad śniežnia minułaha hoda, kali ŭ adstaŭku byŭ adpraŭleny Uładzimir Całko.
Novym ministram staŭ 54-hadovy Andrej Kaŭchuta, jaki da hetaha času ŭznačalvaŭ RUP «Navukova-vytvorčy centr pa hieałohii» pry Ministerstvie pryrodnych resursaŭ.
Andrej Kaŭchuta naradziŭsia ŭ listapadzie 1960 hoda ŭ Mahilovie. Skončyŭ BDU (1983). Ad 1983 da 2004 hoda pracavaŭ Instytucie hieałohii Akademii navuk Biełarusi. Paśla pierajšoŭ na pracu ŭ Ministerstva pryrody i achovy navakolnaha asiarodździa.
My patelefanavali akademiku Radzimu Hareckamu, kab jon daŭ charaktarystyku svajmu kalehu.
«Andrej — heta moj vučań, — adrazu kaža Radzim Haŭryłavič. — Vielmi enierhičny čałaviek, dobra havoryć. Mnie zdajecca, što jahonaja kandydatura całkam pasuje na rolu ministra. Jon kandydat navuk, ciapier piša doktarskuju. Moh by i raniej abaranicca, ale čynavienskija spravy krychu adciahvali ŭvahu. Tema jahonaj doktarskaj «Asadačnyja basiejny Biełarusi».
«Nasamreč ja daŭno pradkazvaŭ, što Andrej Kaŭchuta pojdzie navierch. Ale prablem u jaho budzie niamała, — praciahvaje Radzim Harecki. — Navat u hieałohii navieści paradak budzie niaprosta. Tak atrymałasia, što siońnia pry Akademii navuk hieałohii amal nie zastałosia, usio pry Ministerstvie, a heta nie vielmi dobra. Možna skazać, što jamu nie pazajzdrościš».
Sam Andrej Kaŭchuta ź intelihientnaj siamji. Jahonaja maci (baćki ŭžo pamierli) była litaraturaznaŭcaj, a baćka Marlen Kaŭchuta — taksama hieołaham, pracavaŭ u Akademii navuk, vykładaŭ u Minskim pieduniviersitecie.
A ci pryjazna novy ministr stavicca da biełaruskaj movy? «Jon vielmi dobra havoryć pa-biełarusku. Nie tak mnoha śpiecyjalistaŭ-hieołahaŭ hetak ža svabodna razmaŭlajuć na rodnaj movie. Navat bolš skažu, kali my razam vykładali na hieafaku BDU, to Andrej Kaŭchuta čytaŭ lekcyi pa «Hieatektonicy» i «Strukturnaj hieałohii» na biełaruskaj movie», — raskazvaje Radzim Harecki.
Sapraŭdy, niaciažka znajści navukovyja dapamožniki, napisanyja Andrejem Kaŭchutam pa-biełarusku: «Strukturnaja hieałohija: dapamožnik dla studentaŭ hieahrafičnaha fakulteta», «Tektonika Paŭnočna-Prypiackaha plača» i inšyja.
Dobryja ŭspaminy pra kolišniaha vykładčyka zachavaŭ i sustaršynia chryścijanskich demakrataŭ, vypusknik hieafaka Pavieł Sieviaryniec. «Čałaviek ščyry, hłyboka biełaruski. Kali jon tolki pačynaŭ vykładać, to adčuvałasia, što jahonaja biełaruskaja mova davoli knižnaja. Ale jon udaskanalvaŭ jaje i ŭparta praciahvaŭ čytać składanuju techničnuju dyscyplinu pa-biełarusku. Heta valavy i adkryty čałaviek», — kaža Sieviaryniec.
Pytańnie, ci budzie kali-niebudź Kaŭchuta vykarystoŭvać biełaruskuju movu i na vysokaj dziaržaŭnaj pasadzie?
