«Łahožask» — elitny katedžny pasiołak, jaki buduje kampanija «Trajpł» Juryja Čyža.
Spačatku miljanier ukłaŭ hrošy ŭ stvareńnie harnałyžnaha kompleksu «Łahojsk», toj adkryŭsia 10 hadoŭ tamu. A paśla Čyž vyrašyŭ pabudavać žyłyja damy kala jaho.
Spačatku płanavałasia zabudavać «Łahožask» typovymi katedžami i pradavać ich, adnak popyt na takija damy byŭ słaby. Takija zbudavańni dahetul pradajucca pa $420 tysiač (biez unutranaha azdableńnia).
Biznes-madel daviałosia źmianić. «Trajpł» vystaviŭ na prodaž prosta ziamlu. Haspadary mohuć sami zamović prajekt, adzinaje pažadańnie — zachavańnie adnolkavaha architekturnaha stylu.
Zaraz za pustyja nadzieły prosiać kala $120 tysiač.
U «Łahožasku» jość jašče i taŭnchaŭsy — dvuchpaviarchovyja katedžy-kvatery ź izalavanym uvachodam i ahulnymi bakavymi ścienami. Za ich «Trajpł» prosić ad $200 tysiač (biez unutranaha azdableńnia).
Pakul što ŭdałosia pradać kala pałovy nadziełaŭ, astatnija dahetul čakajuć pakupnikoŭ.
Siarod imionaŭ haspadaroŭ «Łahožaska» — heta pieravažna biełaruskija biznesmieny i top-mieniedžary — vyłučajucca imiony dvuch ułaśnikaŭ.
Viasnoj 2012 hoda «Trajpł» pradaŭ zakansiervavanaje budaŭnictva hramadzianinu Kiryłu Varfałamiejeviču Vachramiejevu.
Heta mirskoje imia mitrapalita Fiłareta. Jašče praź niekalki miesiacaŭ łahojskija čynoŭniki vydzielili śviataru ŭčastak pad domam — u pažyćciovaje vałodańnie z pravam pieradačy ŭ spadčynu.
Što praŭda, spadkajemcaŭ u Fiłareta niama: baćki i starejšaja siastra daŭno pamierli, a mieć žonku i dziaciej «čornamu duchavienstvu» zabaroniena.
Aficyjna nadzieł jamu dali «dla absłuhoŭvańnia žyłoha doma». Ale, zdajecca, budujecca inšy abjekt — hladzicie fota.
Faktyčna, heta pryvatny malitoŭny dom, bo jak chram zbudavańnie nie rehistravałasia.
Budaŭničyja pracy ŭ katedžy-carkvie praciahvajucca dahetul.
U kancy 2013 hoda Fiłaret syšoŭ na spačyn, jamu ŭžo 79 hadoŭ. Nieŭzabavie ŭ Minsk z Rasii pryjechaŭ novy mitrapalit, Pavieł (Hieorhij Panamaroŭ).
A ŭžo ŭ lutym 2014 hoda novaha haspadara znajšoŭ jašče adzin dom u «Łahožasku», jakraz na ŭzhorku praz darohu ad zbudavańnia Fiłareta.
Prajekt doma, jaki byŭ padorany BPC:
1 pavierch. 1. Tambur (4 m2). 2. Harderob (4 m2). 3. Harderob dla vierchniaha adzieńnia (15m2). 4. Haraž (41 m2). 5. Haścioŭnia (35 m2). 6. Stałovaja (28 m2). 7. Kabiniet (23 m2). 8. Topačka (8 m2). 9. Pryłaźnik (3 m2). 10. Saŭna (5 m2). 11. Dapamožnaje pamiaškańnie (2 m2). 12. Tualet (4 m2). 13. Kalidor (6 m2). 14. Terasa (39 m2).
2 pavierch. 1. Choł (34 m2). 2. Spalnia (22 m2). 3. Spalnia (20 m2). 4. Harderobnaja (12 m2). 5. Vannaja (12 m2). 6. Tambur (4 m2). 7. Vannaja (12 m2). 8. Harderobnaja (14 m2). 9. Spalnia (12 m2). 10. Hulniavy pakoj (15 m2). 11. Spalnia (12 m2). 12. Bałkon (3 m2). 13. Łodžyja (6 m2). 14. Bałkon (2 m2). 15. Bałkon (5 m2).
Pavodle dakumientaŭ, staršynia Minskaj abłasnoj nataryjalnaj akruhi Nataša (tak u aficyjnaj papiery) Papina aformiła ziamlu i katedž na joj jak padarunak Biełaruskaj pravasłaŭnaj carkvie. Chto zrabiŭ taki ščodry prezient — 17 sotak elitnaj ziamli i dvuchpaviarchovy dom płoščaj bolš za 300 m2, jakija pradajucca za $400 tysiač? U dakumientach Nacyjalnaha kadastravaha ahienctva takoj infarmacyi niama. Najchutčej, heta niepasredna «Trajpł», jakomu naležać i ŭsie astatnija nieraspradanyja ŭčastki. Kaardynatar prajekta «Łahožask» Pavieł Pratasoŭski nie staŭ kamientavać situacyju, patłumačyŭšy, što kampanija nie nazyvaje imiony svaich klijentaŭ.
U adroźnieńnie ad Fiłareta, novy haspadar nie staŭ ustaloŭvać na dachu pravasłaŭnyja «cybulinki». Vyhladaje na toje, što jon źbirajecca vykarystoŭvać elitny dom pa pryznačeńni — žyć u im. Pracy pa azdableńni ŭ katedžy ŭžo skančajucca.
* * *
Juryj Čyž
Naradziŭsia ŭ 1963 u vioscy Sabali Biarozaŭskaha rajona ŭ šmatdzietnaj baptysckaj siamji. Zakončyŭ BNTU. Ułaśnik roznahalinovaj biznes-impieryi «Trajpł», maje intaresy ŭ naftavym siektary, nieruchomaści, handli, vytvorčaści budmateryjałaŭ, hramadskim charčavańni, turyźmie, sporcie, sielskaj haspadarcy. Trapiŭ pad sankcyi Jeŭrasajuza jak «kašalok Łukašenki».
* * *
Fiłaret (Kirył Vachramiejeŭ)
Naradziŭsia ŭ 1935 u Maskvie, vychadziec z kupieckaha jarasłaŭskaha rodu. Navučaŭsia ŭ Maskoŭskaj duchoŭnaj akademii. Mitrapalit Bierlinski i Siaredniejeŭrapiejski (1973—1978), mitrapalit Minski i Słucki, patryjaršy ekzarch Biełarusi (1978—2013). Hieroj Biełarusi.
