Samki raśpisnych maluraŭ Superb Fairy-wrens (Malurus cyaneus) «pieradajuć» admysłovy «parol» svaim ptušaniatam, jakija vykarystoŭvajuć jaho, kab atrymać ježu ad baćkoŭ i nie dapuścić da jaje ziaziulčaniataŭ.

Raśpisnyja malury — nievialikija vierabjinyja ptuški, źjaŭlajucca aŭstralijskimi endemikami i žyvuć na paŭdniovym uschodzie hetaha kantynientu. Vid časta vykarystoŭvajecca ŭ jakaści pryjomnych baćkoŭ bronzavaj ziaziulaj Horśfiłda Horsfield's Bronze Cuckoo (Chalcites basalis). Heta nievialiki vid ziaziulaŭ, jaki šyroka raspaŭsiudžany ŭ Aŭstralii i adzin z samych zvyčajnych ź niekalkich, jaki padkidvaje svaje jajki maluram.

Niadaŭna daśledčyki vypadkova ŭbačyli, što samka malura śpiavaje svaim jajkam (ci, bolš dakładna, ptušaniatam, jakija jašče znachodziacca ŭ jajkach). Akazałasia, što jana vučyć ich śpiecyjalnamu hołasu, jaki maje śpiecyfičny kavałak. Ptušaniaty zapaminajuć i vykonvajuć jaho kab vyprošvać u baćkoŭ ježu paśla vyłupleńnia. Hety vyprošvajučy hołas byŭ znojdzieny amal identyčnym hołasu maci i tamu dazvalaje i samcu, i samcy malura vykryvać u svaim hniaździe ziaziulčanio, jakoje prosić ježu niapravilna!

 

Kab pravieryć, ci hety hołas ptušaniaty vučać u jajku, ci jon abumoŭleny hienietyčna, navukoŭcy padmianili 22 jajki na roznych hniozdach.
Kali ź ich vyłupilisia ptušaniaty, ich hołas byŭ padobny na hołas pryjomnaj maci, a nie bijałahičnaj.

Navukoŭcy taksama praviali dośledy z hukazapisami, jakija pakazali, što ptuški-baćki najlepš adkazvajuć na hałodnyja hałasy svaich ptušaniataŭ, horš — na hałasy ptušaniat inšych maluraŭ i najbolš redka na hałasy hałodnych ziaziulčaniat.

Atrymlivajecca, što admysłovy hukavy «parol» vypracavaŭsia ŭ maluraŭ, kab źmienšyć pośpiech hniezdavoha parazytyzmu ziaziulaŭ. A heta, ŭ svaju čarhu, dazvalaje patencyjnym pryjomnym baćkam ekanomić čas i enierhiju na vyhadoŭvańni ziaziulčaniataŭ, bo tyja nie mohuć vyvučyć patrebnyja dla pryznańnia «za svaich» huki.

Kali ŭ hniaździe maluraŭ apyniecca chacia b adno ptušania, jakoje nie paŭtaraje «parol», jany nie kormiać nivodnaje i kidajuć hniazdo z vyvadkam, kab raspačać novuju kładku.

Vysokaja indyvidualnaja źmienlivaść patrebnaha da raspaznańnia hołasu amal vyklučaje mahčymaść dla ptušaniat ziaziulaŭ navučycca imitavać jaho. Adnak nasamreč pryjomnyja baćki vykryvali padkidyšaŭ u prykładna 40% vypadkaŭ, bo hałodnyja ziaziulčaniaty sprabujuć kryčać roznymi hałasami.

Dadatkovy faktar, jaki pracuje na karyść maluraŭ
— terminy inkubacyi jajek patencyjnych ptušak-haspadaroŭ i hniezdavych parazitaŭ roznyja, tamu ziaziulčanio maje nievialikija šancy navučycca «parolu» ŭ jajku, bo maje na heta paraŭnalna abmiežavany čas — tolki 2 dni zamiest 5 ŭ embryjonaŭ maluraŭ. Bo navučańnie pačynajecca praz 10 dzion paśla adkładki jajek, a ptušaniaty ziaziulaŭ vyłuplajucca raniej.

Niečakanyja vyniki ŭpieršyniu dakazali mahčymaść darosłych ptušak pieradavać važnuju niehienietyčnuju infarmacyju na stadyi, kali ptušaniaty znachodziacca jašče ŭ jajku.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?