Namieśnik prem'jer-ministra Biełarusi Anatol Kalinin prapanuje z 2015 hoda ŭ Minsku praktyčna nie budavać kamiercyjnaje žyllo — tolki arendnaje i pa dziaržzamovie. Pra heta jon skazaŭ u piatnicu padčas pramoj linii ŭ haziecie «Respublika».

«Ja b prapanavaŭ, z 2015 hoda ŭ Minsku praktyčna nie budavać kamiercyjnaje žyllo — tolki arendnaje i pa dziaržzamovie. U haradach-spadarožnikach taksama nieabchodna budavać arendnaje žyllo.

Heta jeŭrapiejskaja praktyka: pracoŭnyja resursy pryviazvajucca da miesca pracy i šukajuć tam žyllo. A ŭ nas naadvarot: žyllo vyznačaje pryviazku pracoŭnych resursaŭ da terytoryi»,
— adznačyŭ vice-premjer. Pry hetym jon rastłumačyŭ, što «nieabchodna kamiercyjnaje žyllo vynosić u harady-spadarožniki, a dla Minska stvaryć maksimalna kamfortnyja ŭmovy dla pryvatnych zabudoŭščykaŭ arendnaha žylla — heta zadača № 1».

Anatol Kalinin ličyć, što arendnaje žyllo pavinna być nie tolki ŭ stalicy i abłasnych centrach, ale i ŭ tych haradach, dzie jość surjoznyja pramysłovyja kompleksy — Žodzina, Žłobin, Astraviec.

«My ž nie pabudujem tam stolki kamiercyjnaha žylla, a arendnaje — možam. U arendnym žyllo nie miesiac i nie dva žyvuć, a doŭhija hady, a to i ŭsio žyćcio. My zrobim pryvabnym košt pražyvańnia tam. Jon užo ciapier u siarednim u dva razy nižej rynkavaha», — paviedamiŭ jon.
Da taho ž, pa słovach namieśnika vice-premjera, u Biełarusi jość i takaja prablema: častka hramadzian, jakija zdajuć žyllo ŭ arendu, nie płaciać padatki. «Užo jość daručeńnie padatkovaj słužbie zrabić bolš žorstkim padychody. Raz čałaviek atrymlivaje dachody, značyć, jon pavinien płacić padatki ŭ biudžet», — padkreśliŭ Anatol Kalinin.
Arendnaje žyllo budzie jašče bolš stavić čałavieka ŭ zaležnaść ad dziaržavy.
Ciapier čałaviek maje šaniec choć z časam zdabycca na ŭłasnuju kvateru. Z arendnym žyllom pracaŭniki dziaržsiektara, asabliva biudžetniki stanuć pryviazany da dziaržavy namiertva. U toj ža čas niaciažka ŭjavić, što budzie rabicca ŭ damach, jakija ludzi buduć usprymać jak časovaje žytło.

Kali prapanova ab abmiežavańni budaŭnictva kamiercyjnaha žylla, budzie realizavana, heta paznačyć radykalny pavarot u adnosinach čałavieka i dziaržavy.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?