Mižnarodnyja ekśpierty rekamiendujuć akcyjanavać RUP «Biełpošta», paviedamiła napres-kanfierencyi 4 kastryčnika ŭ Minsku hienieralny dyrektar pradpryjemstva Iryna Saksonava.
«U dakumiencie, jaki nazyvajecca „Kompleksny płan reformy i raźvićcia pošty (KPRRP)“ i raspracavany pry kansultacyi mižnarodnych ekśpiertaŭ, utrymlivajecca rekamiendacyja ab akcyjanavańni», — skazała Saksonava.
Jana zaznačyła, što heta praces nie adnaho hoda, tamu što akcyjanavańnie «pravodzicca na peŭnych umovach».«Ja dumaju, što heta pytańnie, mahčyma, budzie razhladacca, i my jaho nie skidvajem z rachunkaŭ», — dadała Saksonava.
Hienieralny dyrektar zaznačyła, što pytańnie akcyjanavańnia «Biełpošty» pieryjadyčna razhladałasia i raniej. «Ale dla taho kab znajści akcyjanieraŭ dla pradpryjemstva, treba jaho spačatku ŭparadkavać, kab biźnies byŭ dachodnym. Treba zacikavić patencyjalnych pakupnikoŭ akcyj dachodnym biźniesam, dla hetaha nieabchodna pravieści madernizacyju», — miarkuje Saksonava.
Jana padkreśliła, što mnohija pasłuhi pošty, asabliva ŭ sielskaj miascovaści, stratnyja, majuć sacyjalnuju skiravanaść, taryfy na ich rehulujucca dziaržavaj.«Paštaljony, jakija pracujuć na vioscy, praktyčna na siabie ničoha nie zarablajuć, a zajmajucca tolki dastaŭkaj pošty. Ja dumaju, što heta nie samaje pryciahalnaje pradpryjemstva dla akcyjanieraŭ», — zaznačyła Saksonava. Razam z tym rekamiendacyi ekśpiertaŭ «buduć razhladacca ŭ dalejšym».
