Ilustracyjnaje fota.

Ilustracyjnaje fota.

Infarmacyja pra mahčymuju epidemiju mieninhitu ŭ Homieli źjaviłasia na sajcie charter97.org. Sajt spasyłajecca na žychara horada, jaki pažadaŭ zachavać ananimnaść.

Pa jaho słovach, u niekalkich rajonach Homiela nibyta ŭspychnuła epidemija mieninhitu. Jahonaja dačka nibyta zaraz u balnicy z takim dyjahnazam.

Hamialčuk miarkuje, što pryčynaj zachvorvańnia moža być kiepskaja vada. «Susiedzi pa pałacie kažuć, što ich dzieci zachvareli paśla taho, jak papili vady z-pad krana», — paviedamlaje čytač charter97.org.

U Homielskaj kliničnaj balnicy №3 karespandentu «NN» paviedamili, što ničoha pra epidemiju mieninhitu nie viedajuć.

«Kali b u horadzie skłałasia padobnaja situacyja, my adrazu ž atrymali b adpaviednyja źviestki z haradskoha centra hihijeny i epidemijałohii», — zapeŭniŭ namieśnik hałoŭnaha ŭrača Aleh Kabyłka.
Pa jaho słovach, zhodna rasparadžeńnia Minachovy zdaroŭja, pacyjenty z padazreńniem na mieninhit nakiroŭvajucca ŭ infiekcyjnuju balnicu.

Adzin ź minskich miedykaŭ u razmovie z karespandentam «NN» patłumačyŭ, što zachvareć na mieninhit, papiŭšy vady z-pad krana, faktyčna niemahčyma. Vada, jakaja pastupaje ŭ kvatery, apracoŭvajecca. A voś u pačatku kupalnaha siezonu niebiaśpieka zachvareć uzrastaje.

Hałoŭny dziaržaŭny sanitarny ŭrač Homielskaj vobłaści, hałoŭny ŭrač Homielskaha abłasnoha centra hihijeny, epidemijałohii i hramadskaha zdaroŭja Alaksandr Tarasienka tak prakamientavaŭ infarmacyju ahienctvu BIEŁTA.

«Tradycyjna ź lipienia adznačajecca siezonny ŭzdym zachvorvańnia enteravirusnaj infiekcyjaj, jakaja vyklikaje anhinu, farynhit i ŭ tym liku sierozny mieninhit. U lipieni hetaha hoda ŭ Homieli było zarehistravana 10 vypadkaŭ sieroznaha mieninhitu, žniŭni — 17, vieraśni — 44. Usie jany byli vyklikanyja nie mieninhakokavaj infiekcyjaj, a enteravirusnaj. Havorki ab epidemii nie idzie, i situacyja znachodzicca pad kantrolem».

Alaksandr Tarasienka dadaŭ, što asnoŭnaj hrupaj ryzyki pa zachvorvańni sieroznym mieninhitam źjaŭlajucca dzieci va ŭzroście da 14 hadoŭ. Asnoŭny šlach pieradačy hetaj chvaroby — pavietrana-kropielny. U ciapierašni čas śpiecyjalisty dziaržsannahladu pravodziać kompleks mier pa papiaredžańni raspaŭsiudžvańnia mieninhitu: pravodziać prafiłaktyčnyja hutarki, pravierki, daśledavańni pitnoj vady i praduktaŭ charčavańnia.

* * *

Mieninhit — zapaleńnie miakkaj abałonki vakoł hałaŭnoha i śpinnoha mozha. Vyklikajecca bakteryjami i virusami. Virusny mieninhit — najbolš raspaŭsiudžanaja forma zachvorvańnia. Jon nie pahražaje žyćciu chvoraha, ale mocna asłablaje arhanizm. Virus pieradajecca pavietrana-kropielnym šlacham. Taksama adnoj z pryčyn źjaŭlajecca kiepskaja hihijena.

Simptomy: vysokaja tempieratura, hałaŭny bol, vanity, razdražnialnaja reakcyja na jarkaje śviatło dy inš.

Pry padazreńni na mieninhit treba nieadkładna źviarnucca pa miedycynskuju dapamohu.
Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?