Bolš čym 200 rabočych AAT «Hrodna Azot» admovilisia padpisvać aficyjnaje papiaredžańnie administracyi pradpryjemstva ab źmianieńni va ŭmovach pracy i źviarnulisia ŭ Biełaruski niezaležny prafsajuz z prośbaj razabracca ŭ situacyi, paviedamiŭ namieśnik staršyni Biełaruskaha kanhresa demakratyčnych prafsajuzaŭ Siarhiej Antusievič.

«Prablema ŭ tym, što apošniaja atestacyja pravodziłasia ŭ 2008 hodzie. Jaje vyniki byli ŭziaty za asnovu ciapierašniaj. Adnak pastanovaj Minpracy za hety čas pamianialisia ŭmovy atestacyi, i atrymałasia, što davoli značnaja častka ludziej (mnie składana havaryć ab dakładnych ličbach, ale razmova idzie ab sotniach ludziej) stracili prava na daterminovuju piensiju, dadatkovy adpačynak i dapłaty za škodnyja abo niebiaśpiečnyja ŭmovy pracy», — raskazaŭ Antusievič.

Jon adznačyŭ, što ŭ zajavach, ź jakimi rabočyja źviarnulisia ŭ BNP, ukazvałasia nie tolki na «dziŭnym čynam praviedzienuju atestacyju», ale i na toje, što administracyja pradpryjemstva akazvaje nacisk na ludziej z patrabavańniem pryznać vyniki hetaj atestacyi.
U vypadku niepryznańnia, patłumačyŭ Antusievič, rabotnika mohuć zvolnić, zhodna z Pracoŭnym kodeksam, u suviazi ź niepryznańniem istotnych źmianieńniaŭ umoŭ pracy.

Pavodle jaho słoŭ, piarvička BNP źviarnułasia ŭ prakuraturu z prośbaj razabracca ŭ situacyi. «Prakuratura źviarnuła ŭvahu tolki na toje, što byŭ nacisk na ludziej, a pa pytańniach atestacyi nakiravali ŭ Minpracy. Inśpiekcyja pa pracy napisała niejkuju adpisku», — skazaŭ Antusievič.

Pavodle jaho słoŭ, u situacyju ŭmiašałasia taksama Fiederacyja prafsajuzaŭ Biełarusi.
«Tam byŭ vysadžany desant z vysokapastaŭlenych čynoŭnikaŭ FPB, Biełchimprafsajuza. Taksama 11 lipienia byŭ, mabyć, płanavy pryjezd pieršaha vice-premjera Uładzimira Siamaški na zavod. Usie hetyja pytańni byli jamu ahučany. Jon pakul prypyniŭ dziejańnie novaj atestacyi, buduć raźbiracca, jak vyrašać situacyju», — skazaŭ Antusievič.

Jon taksama paviedamiŭ, što jašče na adnym hrodzienskim pradpryjemstvie, «Hrodnažyłbud», rabotniki «z-za nizkich zarpłat faktyčna abjavili ŭltymatum kiraŭnictvu pradpryjemstva i zapatrabavali jaje pavieličeńnia».

Akramia taho, 18 lipienia rabočyja adnaho z pradpryjemstvaŭ chołdynhu «Pinskdreŭ» sabralisia na stychijny mitynh. Pavodle infarmacyi staršyni BKDP Alaksandra Jarašuka, kala 200 rabotnikaŭ pradpryjemstva vyjšli sa składu aficyjnaha prafsajuza.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?