Ryhor Kastusioŭ, vychadziec z toj samaj haspadarčaj namienkłatury Škłoŭskaha rajona, što i Alaksandr Łukašenka, abraŭ dla siabie absalutna supraćlehły palityčny šlach.

U minułuju prezidenckuju kampaniju, da jakoj u hramadstvie i siońnia adznačajecca vielmi supiarečlivaje staŭleńnie, Kastusioŭ bałaciravaŭsia kandydatam u prezidenty, dekłarujučy zusim inšyja kaštoŭnaści, čym jaho były znajomy. A ciapier jon źbirajecca zarehistravacca kandydatam u deputaty Nacyjanalnaha schodu. Nakolki heta pravilnaje i dalnabačnaje rašeńnie? Ci vyjhraje ad hetaha BNF, namieśnikam staršyni jakoha źjaŭlajecca spadar Kastusioŭ? Na što raźličvaje jon sam?

— Navošta idziacie na vybary, vynik jakich usim (i vam samomu) zahadzia viadomy?

— Tak, nam usim viadomy vyniki majučaj adbycca vybarčaj kampanii. Deputaty Pałaty pradstaŭnikoŭ, jak zvyčajna, buduć pryznačany, ale

dla Partyi BNF udzieł u vybarčaj kampanii — heta mahčymaść aktyvizavać rabotu z nasielnictvam, praz vyłučeńnie kandydataŭ i ich udzieł u kampanii danieści da hramadzian Biełarusi svajo bačańnie situacyi, svaje prapanovy pa vyviadzieńni krainy z palityčnaha i ekanamičnaha kryzisu.
Udzieł u biahučaj parłamienckaj kampanii — heta jašče i adzin z etapaŭ padrychtoŭki da prezidenckich vybaraŭ 2015 hoda.

— Jak vy aceńvajecie svaju realnuju papularnaść u rehijonie?

— Ja płanuju vyłučacca pa Škłoŭskaj akruzie, jakaja ŭklučaje ŭ siabie Škłoŭski, Białynicki, Kruhlanski rajony, a taksama častkova Mahiloŭski rajon i Mahiloŭ.
Heta ŭžo nie pieršy moj udzieł u vybarach, tamu majo imia dobra viadoma vybarščykam. Da taho ž maja papularnaść uzmacniajecca tym, što ja naradziŭsia ŭ Białynickim rajonie i adpracavaŭ tam na pasadach hałoŭnaha inžyniera i dyrektara saŭhasa 9 hadoŭ. Z 1991 hoda ja pražyvaju i pracuju ŭ Škłovie: bolš za 6 hadoŭ adpracavaŭ na pasadzie kiraŭnika rajonnaha abjadnańnia žyllova-kamunalnaj haspadarki. Paśla majho zvalnieńnia ŭ 2001 hodzie (padkreślivaju: pa palityčnych matyvach) za nastupnyja 10 hadoŭ ažno try kiraŭniki Škłoŭskaj ŽKH pakinuli svaju pasadu pa pryčynach, źviazanych sa słužbovymi złoŭžyvańniami. Dvoje ź ich byli navat asudžany… Ludzi heta taksama viedajuć i ŭličvajuć.

— Vidać, vy čuli niamała paprokaŭ i pramych abvinavačańniaŭ na adras partyi BNF i na svoj asabisty za dziejańni napiaredadni, u čas i asabliva paśla padziej Płoščy-2010. Jość siarod ich spraviadlivyja, jakija možacie pryniać i na partyju, i na siabie?

— Šmat kamu nie padabałasia, što Partyja BNF prymała ŭdzieł u prezidenckaj vybarčaj kampanii jak samastojnaja palityčnaja siła. Adsiul prychavanyja i adkrytyja napadki na nas. Ale

ŭdzieł u prezidenckich vybarach 2010 hoda ŭpieršyniu za apošnija 16 hadoŭ značna paspryjaŭ pavyšeńniu papularnaści i viadomaści našaj partyi.
Na heta stanoŭča paŭpłyvali dobra arhanizavanaja infarmacyjnaja kampanija i šmatlikija sustrečy kandydata i čalcoŭ kamandy z vybarščykami ŭ raznastajnych rehijonach krainy. Škada, što my nadta pozna pryniali rašeńnie ab samastojnym farmacie ŭdziełu ŭ hetaj kampanii, i zapoźnieny start pryvioŭ da niekatorych pamyłak i niedachopaŭ. My praanalizavali ich na pasiadžeńni sojma i nie ŭtojvali ich ad našych siabroŭ. Svaje praliki ja taksama praanalizavaŭ z dapamohaj blizkich paplečnikaŭ, siabroŭ, navat rodnych… Skažu tolki, što sumleńnie majo čystaje, chacia peŭnyja momanty na Płoščy i pieršyja dopyty ŭ KDB byli niaprostymi. Samaje ciažkaje toje, što nie było nijakaj infarmacyi pra realnaje raźvićcio padziej. Zastavałasia tolki aryjentavacca na svaju pierakananaść i vieru ŭ paplečnikaŭ i siabroŭ. Adsiul, liču, i pamyłak było niašmat, bo
kamanda kandydata Partyi BNF pracavała na tych vybarach, hruntujučysia vyklučna na maralnych kaštoŭnaściach
. Hetyja kaštoŭnaści byli zachavany i paśla vybarčaj kampanii. Darečy, paśla padziej na Płoščy mienavita vybarčy štab BNF pieršym aktyŭna dałučyŭsia da spravy salidarnaści z asudžanymi i reprasavanymi.

— A ŭsio ž u hramadstvie jość adčuvańnie, što aŭtarytet i papularnaść BNF z hodu ŭ hod słabieje. Jasna, što heta vymahaje hłybokaha analizu. Na vašu dumku, čamu heta adbyvajecca?

— Aŭtarytet i papularnaść luboj palityčnaj arhanizacyi, u tym liku i BNF, zdabyvajecca tolki praz nastojlivuju, razumnuju, ciažkuju i karpatlivuju pracu z nasielnictvam. Na žal, jak ja kazaŭ vyšej, na praciahu 16 hadoŭ Partyja BNF nie prymała ŭdziełu ŭ prezidenckich kampanijach jak samastojnaja palityčnaja siła. Heta pryviało da taho, što pra BNF pačali zabyvać.

Ale ŭ apošnija try hady adbyvajecca praces pavyšeńnia aŭtarytetu partyi. Toje, što na nas ciapier pačali čaściej napadać z roznych bakoŭ, i jość lepšym śviedčańniem taho, što hety praces idzie ŭ pravilnym kirunku.

— Što budziecie ličyć prystojnym vynikam udziełu ŭ vybarčaj kampanii dla siabie i dla partyi?

— Idučy na parłamienckija vybary, my ŭśviedamlajem, što vybaraŭ jak takich u Biełarusi niama. My dałučajemsia da hetaj vybarčaj kampanii tolki z toj metaj, kab skarystać jaje jak lehalnuju mahčymaść dla raboty z nasielnictvam i danieści da hramadzian našu pazicyju.

Viartańnie ŭzroŭniu papularnaści BNF, jakim jon byŭ na pačatku 90-ch hadoŭ minułaha stahodździa, i budzie samym prystojnym vynikam našaha ŭdziełu ŭ vybarčaj kampanii.
Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?